Եվրոպան մտահոգված է Թուրքիայի ընտրությունների արդյունքներով. The Irish Times

Եվրոպան մտահոգված է Թուրքիայի արտահերթ խորհրդարանական ընտրություններում իշխող Արդարություն և զարգացում կուսակցության հաղթանակով, քանի որ դա հարցականի տակ է դնում երկրում մամուլի ազատության և մարդու իրավունքների պահպանման հարցը։ Այս մասին գրում է The Irish Times-ը։

Հոդվածում նշվում է, որ հաղթանակած կուսակցությունը հիմնել է նախագահ Ռեջեփ Թայիփ Էրդողանը, և որ նրա քաղաքականությունն ուղղված է երկրի տնտեսական զարգացմանն ու կայունության ապահովմանը։

Այդուհանդերձ հեղինակն ընդգծում է, որ լիրայի փոխարժեքի անկումը, մահապարտների իրականացրած պայթյունները և Քրդական աշխատավորական կուսակցության դեմ պայքարը ընտրողների շրջանում միայն սրել են անկայունության զգացողությունը։ Այդ կապակցությամբ Թուրքիայում ակտիվ աշխատանքներ են տանում կառավարության գործողությունների քննադատների դեմ։ Նրանք իրենց հսկողության տակ են առնում ընդդիմադիր հեռուստաընկերություններն ու ձերբակալում են լրագրողներին, որոնք Էրդողանի հասցեին անհեթեթ հայտարարություններ են անում։

Լրատվամիջոցներում խոսքի ազատության սահմանափակումները և Թուրքիայում մարդու իրավունքների ոտնահարումներն առաջ են բերում միջազգային իրավապաշտպան կազմակերպությունների դժգոհությունը։ Ընդդիմադիր Հանրապետական կուսակցության պատգամավոր Ֆարուք Լողօղլուն մտահոգություն է հայտնել, որ Էրդողանի կուսակցության իշխանության ներքո երկիրը բոլոր ճակատներում հետընթաց կապրի։

Սակայն Եվրոպայի համար էրդողանի կուսակցության հաղթանակը ոչ միայն անհանգստության պատճառ է, այլ մխիթարություն, քանի որ հենց Արդարություն և զարգացում կուսակցության ղեկավարությունն է համաձայնել միգրացիոն ճգնաժամի ժամանակ ընդունել ավելի քան 2 մլն սիրիացի փախստականներին: