Տուլայի նահանգապետը ցավակցել է ավտոբուսի վթարից զոհված ՀՀ քաղաքացիների հարազատներին

Տուլայի մարզի նահանգապետ Վլադիմիր Գրուզդևը ցավակցություն է հայտնել Տուլայի մերձակայքում Մոսկվայից Երևան ընթացող մարդատար ավտոբուսի վթարի հետևանքով զոհվածների հարազատներին ու մերձավորներին: Նրա խոսքով՝ տուժածների թիվը հասել է 47-ի, տեղեկացնում է «Արմենպրես»-ը՝ հղում անելով «Ինտերֆաքս»-ին: «Յոթ մարդ է զոհվել այդ ահավոր ողբերգության հետևանքով: Նախնական տվյալներով՝ բոլորն էլ Հայաստանի քաղաքացիներ են: Խորը ցավակցություն եմ հայտնում զոհվածների հարազատներին ու ընտանիքներին»,- գրել է Գրուզդևը Twitter-ում:

Նահանգապետը նշել է, որ ավտոբուսում եղել է 63 մարդ, նրանցից տուժել են 47-ը: «Ճանապարհատրանսպորտային պատահարի վայրում աշխատել է շտապ բուժօգնության 13 բրիգադ: Տուլայի բժիշկները ցուցաբերում են անհրաժեշտ ողջ օգնությունը: Թեժ գծի հեռախոսահամարն է՝ 88002007102»,- հավելել է տարածաշրջանի ղեկավարը:

Ավելի վաղ ՌԴ ՆԳ նախարարության տարածաշրջանային վարչության ներկայացուցիչ Անդրեյ Յարցևը հայտնել է, որ վթարի հետևանքով զոհվել է յոթ, հոսպիտալացվել է 35 մարդ: Իր հերթին արտակարգ ծառայությունների աղբյուրը հայտնել է, որ 35 տուժածներից յոթը ծանր վիճակում են, ևս տասի վիճակը միջին ծանրության է: Բոլոր տուժածներին ուղարկել են Ուզլովայա, Կիրեևսկ և Բոգոռադիցկ քաղաքների հիվանդանոցներ:

Վթարային փրկարարական աշխատանքները վթարի վայրում գործնականում ավարտված են: ԱԻՆ-ի աշխատակիցներն ավտոբուսը կանգնեցրել են անիվների վրա և տեղափոխել պատահարի վայրից: Ներկայում ավտոճանապարհի տեղամասում երթեեկությունը վերականգնված է, բայց ողջ ամբողջությամբ, քանի որ վթարի վայրում մնում են ուղևորների իրերը:

Մոսկվայի ժամանակով ժամը 02:10-ին «Դոն» համերկրային ավտոմայրուղում՝ Ուզլովայայի շրջանում, կողաշրջվել է Մոսկվա-Երևան երթուղով ընթացող Hyundai մարդատար ավտոբուսը: Ուղևորների մեջ երեխաներ չեն եղել:

Դիտարկվում են ճանապարհատրանսպորտային պատահարի երկու առավել հավանական պատճառներ. վարորդը քնել է ղեկին և փոխադրամիջոցի տեխնիկական անսարքությունը:

Ներկայումս ավտոբուսի ուղևորները գտնվում են ժամանակովր տեղավորման կետում, որն սկսել է գործել Ուզլովայայի «Յունոստ» կինոթատրոնի շենքում: Ռուսաստանի ԱԻՆ-ի Տուլայի մարզի գլխավոր վարչությունում բացվել է «թեժ գիծ»՝ 8(4872)21-16-09 հեռախոսահամարով: