Արտեմ Ասատրյանը մանրամասներ ներկայացրեց ավանդների դիմաց փոխհատուցման ծրագրից

«Ավանդների դիմաց փոխհատուցում» ծրագրի շրջանակում 2006-2013թ. ընթացքում անապահովության համակարգում գրանցված շուրջ 62 հազար անձ ստացել է փոխհատուցում ավանդի դիմաց:

Այս մասին Ազգային ժողովում ՀՀ 2016թ. պետական բյուջեի նախագծի քննարկման ժամանակ ասաց ՀՀ աշխատանքի և սոցիալական հարցերի նախարար Արտեմ Ասատրյանը՝ պատասխանելով ԱԺ ՀՀԿ խմբակցության պատգամավոր Մարգարիտ Եսայանի հարցին: «Մենք այս ծրագիրը սկսել ենք 2006թ. առանձին սոցիալական խմբերի առաջնահերթության սկզբունքով: Մենք սահմանեցինք, որ մինչև 1931թ. դեկտեմբերի 31-ը ծնված այն քաղաքացիները, ովքեր ներառված են նաև անապահովության համակարգում կարող են ԽՍՀՄ ավանդների դիմաց փոխհատուցում ստանալ: Ծրագիրն ավարտվեց 2013թ. և այդ 7 տարվա ընթացքում շուրջ 62 հազար անձ ստացել են փոխհատուցում ավանդների դիմաց»,- «Արմենպրես»-ի հաղորդմամբ՝ նշեց նախարարը:

Նախարարը հավելեց, որ կառավարությունն այս ծրագիրը շարունակվել է 2014թ.՝ որոշակիորեն փոխելով չափանիշները: «Այս դեպքում արդեն մենք որպես առաջնահերթություն սահմանեցինք ոչ թե անապահովության մակարդակը, այլ հենց տարիքը: Այսինքն՝ մինչև 1931թ. դեկտեմբերի 31-ը ծնված անձինք կարող էին օգտվել այս ծրագրից: 2014թ. ընթացքում ևս 12-13 անձ ստացել են փոխհատուցում ավանդների դիմաց»,- մանրամասնեց Ասատրյանը:

Նա հայտնեց, որ ծրագիրը շարունակվում է նաև 2015թ.: Այս տարի ծրագրից օգտվելու հնարավորություն ունեն տարեցները, ազատամարտիկները և սահմանամերձ համայնքների բնակիչները: