Տուլայի մարզում վթարված ավտոբուսի 12 տուժածները դեռևս բուժում կստանան ՌԴ-ում

Մոսկվա-Երևան ավտոբուսի վթարից տուժած քաղաքացիների մի մասն ու զոհվածների աճյունները նոյեմբերի 5-ին կտեղափոխվեն Հայաստան և այստեղ կլինեն տեղի ժամանակով 20:00-ին: Այս մասին լրագրողների հետ ճեպազրույցում հայտնեց ՀՀ տրանսպորտի և կապի փոխնախարար Արթուր Առաքելյանը: Նրա խոսքով' Հայաստան կտեղափոխվեն այն քաղաքացիները, որոնց առողջական վիճակը թույլ է տալիս, իսկ 12 այլ տուժածներ դեռևս կմնան Ռուսաստանում' բուժումը շարունակելու Տուլայի մարզի հիվանդանոցներում: «Այս պահին դեռևս անհրաժեշտություն չկա այդ հիվանդներին այլ բժշկական հաստատություններ տեղափոխելու»,- ասաց փոխնախարարը:

Ինչ վերաբերում է վթարի մեղավորներին պատասխանատվության ենթարկելու հարցին, ապա Արթուր Առաքելյանը նշեց, որ ընթանում է հետաքննություն, որի ավարտին համապատասխան վերլուծություններ կարվեն: «Ստացել ենք հանձնարարություն առաջարկություններ անել ուղևորափոխադրումների ոլորտին բերաբերող օրենսդրության փոփոխության համար: Շուտով, երբ ավարտվի հետաքննությունը, բացահայտվեն պատճառները, դրանից ելնելով համապաստապան հետևություններ կարվեն»,-նշեց փոխնախարարը' ավելացնելով, որ ներկայում ուղևորափոխադրումների ոլորտը ավելի ազատական է, բայց նախատեսվում է փոփոխությունների արդյունքում խստացնել վերահսկողության մեխանիզմները: «Մենք շարժվել էինք առավել լիբերալ կանոնների հաստատմամբ, այդ օրենսդրությունը կես տարի է շրջանառվում է, բայց կարծում ենք, որ պետք է վերահսկողությունն ավելացնենք, բայց դեռ սպասում ենք հետաքննության արդյունքներին»,-հավելեց նա:

Արթուր Առաքելյանի դիտարկմամբ' երբ ավելացվում է վերահսկողությունը, մեծանում է ճնշումը բիզնեսի վրա, որի արդյունքում էլ շատանում են բողոքները, բայց ներկայում փորձում են գտնել հավասարակշռված տարբերակ, որը թույլ կտա առավել անվտանգ դարձնել ոլորտը: