Հայաստանում այս տարի զբոսաշրջության զգալի աճ չի գրանցվել. Ապրեսյան

Հայաստանում զբոսարջության ոլորտում 2015-ին զգալի աճ չի գրանցվել: «Արմենպրես»-ի հետ զրույցում այս մասին ասաց ՀՀ էկոնոմիկայի նախարարության Զբոսարջության վարչության պետ Մեխակ Ապրեսյանը: «Առաջին եռամսյակում նախորդ տարվա նույն ժամանակաշրջանի համե մատ գրանցվել է 4 տոկոս նվազում, երկրորդ եռամսյակում 1,8 տոկոս աճ, երրորդ եռամսյակում 0,2 տոկոս նվազում: 2015-ի այս ցուցանիշը հիմնականում պայմանավորված է Ռուսաստանից այցելությունների նվազմամբ, որն էլ իր հերթին պայմանավորված է ռուսական ռուբլու արժեզրկմամբ»,-ասաց վարչության պետը:

Ապրեսյանի խոսքով' Հայաստան եկող զբոսաշրջիկերի գրեթե 45 տոկոսը գալիս են Ռուսաստանից, մյուս տոկոսային մասը զբաղեցնում են Վրաստանը, ԵՄ երկրները, Իրանը, ԱՄՆ-ը և այլն: «Հայաստանը, որպես բավականին երիտասարդ զբոսաշրջային երկիր, պայմանականորեն զբոսաշրջությունն սկսել է հաշվարկել 2000 թվականից: 2000թ. Հայաստան են այցելել 45 հազար զբոսաշրջիկներ: 2000-2014թթ. զբոսաշրջությունը Հայաստանում միմիայն աճ է գրանցել: 2014-ին Հայաստան է այցելել 1 միլիոն 204 հազար զբոսաշրջիկ»,- նշեց վարչության պետը:

Ապրեսյանի փոխանցմամբ' ՀՀ էկոնոմիկայի նախարարության Զբոսաշրջության վարչությունը մի քանի տարին մեկ անգամ իրականացնում է զբոսաշրջային այցերի վիճակագրություն, վերջինն անցկացվել է 2013թ.: «Մեկ տարվա ընթացքում ամսվա մեջ որոշակի օրերի սահմանային բոլոր անցակետերում հարցումներ են անցկացվում: Հարցումներն անցկացվում են ՄԱԿ-ի զբոսաշրջության համաշխարհային կազմակերպության մեթոդաբանությանը համապատասխան: Հարցումներն արվում են Հայաստան եկող և Հայաստանից մեկնող յուրաքանչյուր 15-րդ զբոսաշրջիկից»,- նշեց նա:

Հարցումներ անելու արդյունքում, ինչպես նշեց վարչության պետը, պարզ է դառնում, թե քանի զբոսաշրջիկ է եկել Հայաստան, գոհ են, դժգոհ, որ վայրերն են այցելել և այլն: 2013 թվականին արված հետազոտությունների համաձայն' հարցվածների 98 տոկոսը պատասխանել էր, որ էլի կայցելի Հայաստան:

Մինչև 2008-2009 թթ. զբոսաշրջության միջին տարեկան աճը կազմել է 25 տոկոս, իսկ 2009-ից հետո նվազել է մինչև 10 տոկոս' պայմանավորված հատկապես տարբեր երկրների ազգային արժույթների անկմամբ: