Հայաստանում զբոսաշրջությունն առավել դինամիկ զարգացող ճյուղերից է. Հովիկ Աբրահամյան

Հայաստանում զբոսաշրջությունն առավել դինամիկ զարգացող ճյուղերից է. նախորդ տարի երկիր է այցելել շուրջ 1 միլիոն 204 հազար զբոսաշրջիկ: Միևնույն ժամանակ, Հայաստանում զգալիորեն ակտիվացել է հյուրանոցաշինությունը: Այս մասին ԱՄՆ Միջազգային զարգացման գործակալության (ԱՄՆ ՄԶԳ) և Սմիթսոնյան ինստիտուտի համագործակցությամբ ազդարարված «Իմ Հայաստան» ծրագրի մեկնարկին նշեց ՀՀ վարչապետ Հովիկ Աբրահամյանը: «Զբոսաշրջությունը համաշխարհային տնտեսության գերակա ճյուղերից է և մեծ ազդեցություն ունի տնտեսության զարգացման վրա»,- նշեց Հովիկ Աբրահամյանը:

ՀՀ վարչապետը շեշտեց, որ Հայաստանի մշակութային ժառանգությունն անփոխարինելի տեղ է գրավում համաշխարհային մշակութային ժառանգության գանձարանում: «Հրատապ են մշակութային ժառանգության և երկրի կայուն զարգացմանն ուղղված գործընթացները, որոնք հնարավորություն կընձեռեն պահպանել մշակութային ժառանգությունը, հանրահռչակել և այն դիտարկել որպես երկրի կայուն զարգացման սոցիալական և տնտեսական ռեսուրս»,- նշեց նա:

ՀՀ կառավարությունը պատրաստ է շարունակել համագործակցությունն ԱՄՆ Միջազգային զարգացման գործակալության հետ: «Վստահ եմ, որ մեկնարկող ծրագիրն իր անմիջական ազդեցությունը կունենա աշխարհում Հայաստանի հոգևոր և մշակութային ժառանգության ներկայացման գործում և կխթանի զբոսաշրջության զարգացումները»,- հավելեց նա:

Նոյեմբերի 20-ին ԱՄՆ Միջազգային զարգացման գործակալությունը (ԱՄՆ ՄԶԳ) և Սմիթսոնյան ինստիտուտը ազդարարեցին «Իմ Հայաստանը» ծրագրի մեկնարկի մասին: Ծրագրի նպատակն է զարգացնել և ընդլայնել մշակութային զբոսաշրջությունը Հայաստանի մարզերում: Վերապատրաստման դասընթացների, ծրագրերի մշակման, համայնքների ներգրավման, փաստագրման և այլ միջոցներով ծրագրի անձնակազմը կաշխատի հայաստանյան գործընկերների հետ' մշակութային ժառանգությունը պահպանելու նպատակով նոր ռազմավարություններ մշակելու համար: Ծրագիրը կնսպաստի երկրի գյուղական համ այքների զարգացմանը և կբարձրացնի Հայաստանի մասին իրազեկությունը միջազգային շուկաներում: