Ռուսաստանն առաջնորդի տեղ է պահանջում ԻՊ-ի դեմ պայքարի կոալիցիայում. The Nation

Ինչպես ԱՄՆ-ի դեմոկրատները, այնպես էլ հանրապետականները պետք է կողմնորոշվեն, թե արդյոք նրանք ցանկանում են Մոսկվայի հետ կոալիցիա ստեղծել ընդդեմ «Իսլամական պետության», կամ պատրաստվում են շարունակել Կրեմլը որպես թշնամի ընկալել, գրում է The Nation ամսագիրը:

Հոդվածի հեղինակի կարծիքով, եթե քաղաքական գործիչների գլխավոր նպատակը միջազգային անվտանգությունն է, ապա անհնար է այլընտրանք գտնել այդպիսի կոալիցիային: Ներկայումս «Իսլամական պետությունը» և այլ ահաբեկչական խմբավորումներն առավել լուրջ սպառնալիք են, քանի որ, սկսելով Մերձավոր Արևելքում, Աֆրիկայում հարձակումներից՝ նրանք պատերազմ են հայտարարել ամբողջ Արևմուտքին: ԻՊ-ն արդեն զարգացող պետություն է, որը վերահսկում է մեծ տարածքներ, ունի զենքի տպավորիչ քանակություն, բյուջե և գաղափարախոսություն:

Հեղինակը նշում է, որ ԻՊ-ին վերացնելն անհնար է առանց Ռուսաստանի հետ համագործակցության, որն ունի մեծ ռեսուրսներ, լուրջ ռազմական կարողությունների և կապեր Մերձավոր Արևելքում: Վերջին մի քանի տարիների ընթացքում ահաբեկչական հարձակումների պատճառով Ռուսաստանը մեծ թվով մարդկային կորուստներ է ունեցել և զարգացող հակաահաբեկչական կոալիցիայում արժանապես պահանջում է առաջատարի դեր: Եթե Արևմուտքը մերժի նրան այդ հարցում, ապա ՌԴ-ն շարունակելու է պայքարել այդ դերի համար՝ Իրանի և Չինաստանի աջակցությամբ, գրում է պարբերականը:

Ըստ հեղինակի, արդեն երկու տարի է, ինչ ԱՄՆ-ի և Ռուսաստանի միջև նոր սառը պատերազմ է ընթանքում, որն առաջացել է Ուկրաինայում հակամարտության պատճառով: Այդ առումով ԱՄՆ-ի քաղաքական գործիչները տարածում են «պուտինաֆոբիան և նույնիսկ ռուսոֆոբիան»: Քիչ հավանական է, որ նրանք կվերանայեն իրենց վերաբերմունքը, քանի որ ԱՄՆ-ի նախագահի ներկայիս թեկնածուների թվում շատերը, ինչպես օրինակ Հիլարի Քլինթոնը, շարունակում են մեծամտությամբ արտահայտվել Ռուսաստանի հասցեին, չնայած ԻՊ-ի կողմից աճող սպառնալիքին: