Հայաստանում կանանց անպտղության տարածվածության հաճախականությունը 14,9 տոկոս է

ՀՀ առողջապահության նախարար Արմեն Մուրադյանի մոտ պետական պատվերի շրջանակում վերարտադրողականության օժանդակ տեխնոլոգիաների կիրառմամբ բժշկական օգնություն և սպասարկում իրականացնող բուժհիմնարկների ղեկավարների մասնակցությամբ կայացել է անպտղության բուժման և հաղթահարման հնարավոր ուղիների վերաբեր յալ քննարկում, որի ժամանակ, ՀՀ ԱՆ գլխավոր մանկաբարձ-գինեկոլոգ Ռազմիկ Աբրահամյանը ներկայացրել է, որ ՀՀ վիճակագրության ազգային ծառայության տվյալներով 2015թ. հունվարի 1-ի դրությամբ Հայաստանի Հանրապետությունում կա 20-45 տարեկան 602 հազար 650 կին,և հաշվի առնելով անպտղության տարածվածության հաճախականությունը (14,9 տոկոս)' կարելի է կանխատեսել, որ 89 հազար 795 կին կարող են ունենալ անպտղություն։ Վիճակագրական տվյալներով' նրանցից 30 հազարի մոտ անպտղությունն առաջնային է, երբ կինը երբևէ չի հղիացել, իսկ 60 հազարի մոտ` երկրորդային, երբ կինը չի կարողանում ունենալ ցանկալի երկրորդ, երրորդ կամ չորրորդ երեխան։

Ներկայացվել է, թե որոնք են անպտղության պատճառները, ինչ բուժումներ են իրականացվում տարբեր ախտորոշումների դեպքում։ Նշվել է, որ մասնագիտական վերլուծությամբ ժամանակակից հետազոտման և բուժման կարիք ունի շուրջ 54 հազար, իսկ վերարտադրողական օժանդակ տեխնոլոգիաների' 35 հազար կին։

«Մենք պետք է մանրամասն ուսումնասիրենք, թե որոնք են հիմնական թիրախները և ինչ ուղղվածությամբ տանենք աշխատանքները»,- ասել է նախարարը' ընդգծելով, որ անհրաժեշտ է իրականացնել թե՛ այնպիսի ծրագրեր, որոնք կարճ ժամանակում կնպաստեն անպտղության բուժմանը' բարելավելով ծնելիության ցուցանիշը, և թե՛ հեռահար ծրագրեր, որոնք կապահովեն դեռատի աղջիկների վերարտադրողական առողջության բարելավումը, աբորտների և սեռավարակների կանխարգելումը։

Արմեն Մուրադյանը հանձնարարել է առաջարկներ ներկայացնել, թե ինչ մեխանիզմներով է հնարավոր ֆինանսական եղած միջոցներով առավել մեծ արդյունքներ ստանալ։