Time-ի ընթերցողները ընտրել են տարվա մարդուն

ԱՄՆ-ի Վերմոնտի նահանգից անկախ սենատոր Բեռնի Սանդերսը, Time հանդեսի ընթերցողների կարծիքով, գլխավորել է «Տարվա մարդը» վարկանիշը: Այդ մասին, ինչպես տեղեկացնում է «Արմենպրես»-ը, հայտնի է դարձել դեկտեմբերի 6-ին քվեարկության ավարտվելուց հետո:

Հրատարակության ներկայացուցիչները դեռևս պաշտոնապես չեն նշել հանդեսի ընթերցողների կարծիքով հաղթողի անունը, բայց Սանդերսը, որը հավակնում է Դեմոկրատական կուսակցությունից ԱՄՆ-ի նախագահի թեկնածու առաջադրվելուն, առջևից է ընթանում զգալի առավելությամբ՝ գործնականում ոչ մի շանս չթողնելով մրցակիցներին:

Սենատորը, որը հայտնի է ձախ հայացքներով և իրեն համարում է սոցիալիստ, արդեն ստացել է ձայների 10,2 տոկոսը: Այս պահի դրությամբ, երկրորդ տեղում պակիստանցի իրավապաշտպան Մալալա Յուսուֆզայն է (5,2 տոկոս), առաջատարների եռյակը եզրափակում է Հռոմի Ֆրանցիսկոս պապը (3,7 տոկոս), չորրորդ տեղում ԱՄՆ-ի նախագահ Բարաք Օբաման է (3,5 տոկոս), հինգերորդում՝ ԱՄՆ-ում ժողովրդականություն վայելող The Late show հեռուստատեսային շոուի վարող Սթիվեն Կոլբերտը (3,1 տոկոս):

Վարկանիշում տեղ գտած քաղաքական գործիչների թվում են Հնդկաստանի վարչապետ Նարենդրա Մոդին (2,9 տոկոս), որն անցյալ տարի հաղթող էր դարձել այս քվեարկությունում, Գերմանիայի կանցլեր Անգելա Մերկելը (2,4 տոկոս), միլիարդատեր Դոնալդ Թրամփը, որը հավակնում է Հանրապետական կուսակցությունից ԱՄՆ-ի նախագահի թեկնածու առաջադրվելուն (1,8 տոկոս), ինչպես նաև Ֆրանսիայի նախագահ Ֆրանսուա Օլանդը (1,7 տոկոս):

Դեկտեմբերին 9-ին Time-ը «Տարվա մարդուն» կհայտարարի նաև խմբագրության կարծիքով:

Time-ի վարկածով, «Տարվա մարդն» առաջին անգամ հայտարարվել է 1923 թվականին, և նա ամերիկացի օդաչու Չառլզ Լինգբերգն էր, որը միայնակ օդով հատել է Ատլանտյան օվկիանոսը: Հետագայում այս պատվավոր կոչումն ստացածների թվում եղել են Ջորջ Բուշ կրտսերը, Հռոմի Հովհաննես Պողոս Երկրորդ պապը, Ուինսթոն Չերչիլը, Իոսիֆ Ստալինը: 2007 թվականին «Տարվա մարդ» է դարձել Վլադիմիր Պուտինը, հաղորդել է ՏԱՍՍ-ը: