Քուրդ կանանց պատճառով ԻՊ-ի գրոհայինները դրախտ չեն ընկնի. The Independent

Քուրդ կանանցից կազմված ժողովրդական ջոկատները «Իսլամական պետության» գրոհայինների համար ամենագլխավոր սպառնալիքներից մեկն են, գրում է The Independent-ը:

«Նրանք կարծում են, որ պայքարում են հանուն իսլամի: Նրանք հավատում են, որ եթե ԻՊ-ից որևէ մեկը սպանվում է աղջկա ձեռքով, նա դրախտ չի ընկնում»,-հայտարարել է կանանց ջոկատներից մեկի հրամանատարը:

Պարբերականը նշում է, որ երիտասարդ կանանցից կազմված ջոկատները ձեւավորվել են 3 տարի առաջ և առանցքային դեր են խաղացել Քոբանիի համար պայքարում: 20-ամյա կին զինվոր Էֆելինի խոսքով, եթե ԻՊ-ի գրոհայինները որոշեն վերադառնալ Քոբանի, ապա «նրանցից ոչ մեկը ողջ չի մնա»:

Նշվում է, որ նման ջոկատների գործունեությունը հակասում է հասարակության մեջ կնոջ դերի մասին ջիհադիստների այն պատկերացումներին: Իրենց հռչակագրում ԻՊ-ի գրոհայինները քննադատում են գենդերային հավասարության գաղափարները և պնդում, որ կնոջ հիմնական դերը մայր և օջախի պահապան լինելն է: