ՌԴ ՊՆ-ն հերքել է Վրաստանի օդային տարածքը խախտելու մասին տեղեկատվությունը

ՌԴ պաշտպանության նախարարությունը հերքել է Վրաստանի ԱԳՆ հայտարարությունն այն մասին, թե ռուսական ուղղաթիռը խախտել է Վրաստանի օդային տարածքը: Ինչպես հաղորդում է «Արմենպրես»-ը, վկայակոչելով «Ինտերֆաքս»-ը, ՌԴ ՊՆ մամուլի ծառայության և տեղեկատվության բաժնի ղեկավար Իգոր Կոնաշենկովը նշել է, որ վերջ ին օրերի ընթացքում ռուսական ռազմական ուղղաթիռները Վրաստանի սահմանին մոտ թռիչքներ չեն իրականացրել: Նա վրացիներին խորհուրդ է տվել հաջորդ անգամ նման աղմկահարույց հայտարարություններ անելուց առաջ հիմնվել իրական փաստերի և ռադիոլոկացիոն տվյալների վրա:

Վրաստանի արտաքին գործերի նախարարությունը պնդում է, որ վերջին օրերի ընթացքում ռուսական թռչող սարքերը երկու անգամ խախտել են Վրաստանի օդային տարածքը: Վրաստանի ԱԳՆ-ի պաշտոնական հաղորդագրության համաձայն՝ խախտումներն արձանագրվել են դեկտեմբերի 9-ի երեկոյան և դեկտեմբերի 10-ի առավոտյան:

«Այս տարվա դեկտեմբերի 9-ին, ժամը 18:48-ին ռուսական անօդաչու թռչող սարքը օկուպացված Ցխինվալիի տարածքից խախտել է Վրաստանի օդային տարածքը և թռել է ոստիկանական բաժանմունքների վրայով, որոնք տեղակայված են Վրաստանի կենտրոնական իշխանությունների վերահոսկողության տակ գտնվող տարածքներում»,- ասված է հաղորդագրության մեջ:

Վրաստանի ԱԳՆ-ի տվյալներով՝ դեկտեմբերի 10-ին, ժամը 12:48-ին, նույնպես Ցխինվալիի շրջանից Վրաստանի օդային տարածքը խախտել է ռուսական Մի-8 ուղղաթիռը: «Օդային տարածքը խախտած ուղղաթիռը թռել է Վրաստանի ներքին գործերի նախարարության ոստիկանության շենքի վրայով, որը տեղակայված է Վրաստանի իշխանությունների վերահսկողության տակ գտնվող տարածքում»,- պնդել է Վրաստանի ԱԳՆ-ն: