Պուտինն անմահ է. The Telegraph (լուսանկարներ)

«Վլադիմիր Պուտին, թե՞ Դունքան Մաքլաուդ»,- Ռուսաստանի նախագահի ծագման վերաբերյալ անսպասելի հարցը տանջում է Բրիտանական The Telegraph պարբերականի լրագրողներին: Թերթի աշխատակիցները հայտնաբերել են 1920 և 1941 թթ. լուսանկարներ, որոնցում պատկերված անձը կասկածելիորեն նման է Ռուսաստանի ղեկավարին: Հասանելի բացատրությունների որոնումները լրագրողներին չափազանց հեռու են տանում և նրանք ֆանտաստիկ տարբերակներ են առաջ բերում՝ քաղաքական գործչի ոչ երկրային ծագումից՝ մինչև անմահություն:

Պուտինի նմանակների ֆենոմենը բացահայտելու համար՝ The Telegraph-ը հետաքննությանն է միացրել Twitter-ի օգտատերերին:

Խմբագրությունն առաջարկել է հետևորդներին պատասխանել այն հարցին՝ «Արդյոք անմա՞հ է Պուտինը», իսկ արդյունքներն էլ առավել անսպասելի էին: Ընդամենը մեկ ժամում լսարանի 66%-ն ասել է «այո», իսկ լրագրողները Ռուսաստանի առաջնորդի հանդեպ նման ուշադրությունն ավելորդ են համարել:

Մինչդեռ, ինտերնետ օգտվողները բրիտանացի լրագրողներին մտահոգության ավելի շատ առիթներ են տվել: Պարզվել է, որ ՌԴ նախագահի ևս մեկ նմանակ չարաբաստիկ քմծիծաղ է տալիս XIX դարի Հունաստանի գեներալի դիմանկարից: 

The Telegraph-ի մյուս ընթերցողները հարցին, թե՝ «անմա՞հ է արդյոք Պուտինը»՝ պատասխանել են. «Նույնիսկ ավելին, քան կարծում եք»: