Ռուսաստանն ու Թուրքիան դարձել են գլոբալ «պոստմոդեռնի դարաշրջանի պատերազմի» մի մասը. Japan News

Միջազգային հանրությունը պետք է գիտակցի, թե ինչքան մեծ է անդունդը Ռուսաստանի նախագահ Վլադիմիր Պուտինի և Թուրքիայի առաջնորդ Ռեջեփ Թայիփ Էրդողանի միջև, և դադարի հուսալ երկու երկրների միջև հակամարտության շուտափույթ ավարտին, գրում է The Japan News թերթը:

Նշվում է, որ լինելով մեծ երկրի առաջնորդ՝ Պուտինն ունի բարձր ինքնագնահատական, մինչդեռ Էրդողանը դեռևս չի մոռացել, որ Սիրիան երբեմնի Օսմանյան կայսրության իշխանության տակ է եղել: Հոդվածի հեղինակի կարծիքով՝ դա հանգեցնում է Մոսկվայի և Անկարայի միջև «սառը» պատերազմի, ինչպես նաև ռուս-իրանական հարաբերությունների ամրապնդմանը:

Եթե ներկայիս լարվածությունը տարածվեր միայն երկու երկրի վրա, ապա հնարավոր կլիներ խոսել փոխզիջման որոնման մասին: Սակայն հակամարտությունը Սիրիայում, որում այս կամ այն չափով ներգրավված են Ռուսաստանն ու Թուրքիան, միայն սրում է այս «պոստմոդեռնի դարաշրջանի պատերազմը»: Դրան ի հավելում նաև համաշխարհային սպառնալիքն է՝ «Իսլամական պետության» տեսքով, ընդգծում է պարբերականը:

Իրավիճակը բարդացնում է նաև ԱՄՆ նախագահ Բարաք Օբամայի զսպվածությունը, ով, ըստ որոշ փորձագետների՝ Մերձավոր Արևելքի խնդիրների լուծումը դրել է Ռուսաստանի վրա: Ի տարբերություն Օբամայի՝ Պուտինը պատրաստ է ընդունել «պոստմոդեռնի դարաշրջանի պատերազմի» մարտահրավերները և հանուն իր երկրի հեղինակության վերականգման՝ մտադիր է «սեփական պայմաններով» պայքարել ահաբեկչության դեմ:

Այնուամենայնիվ, հոդվածի հեղինակը կարծում է, որ ժամանակի ընթացքում, Էրդողանն ու Պուտինը «խելամտորեն կվարվեն», վերջ կդնեն ռուս-թուրքական հակամարտությանը և կմիավորվեն իրական գլոբալ սպառնալիքներին դիմակայելու հարցում: