ԵԱՏՄ-ում առկա տնտեսական ճգնաժամի պայմաններում Հայաստանը կարողացել է իրավիճակը հաղթահարել նվազագույն ցնցումներով

Անցնող 2015թ.-ը բիզնեսի համար դժվարին, սակայն, միևնույն ժամանակ, զարգացման տարի էր: ՀՀ նախագահի մոտ կազմակերպված ընդունելությունից հետո լրագրողների հետ զրույցում գործարար Վահե Բադալյանը, ով եղբոր հետ հիմնադրել և ղեկավարում է «Ֆասթ Կրեդիտ» գրավատների ցանցը, «Կովկաս» ռեստորանային համալիրը և «Բեթ Կոնստրակտ» ընկերությունը, ընդգծեց, որ ընթացիկ բարդ տնտեսական տարվա ընթացքում իրենց հաջողվել է ընդլայնել «Ֆասթ Կրեդիտ» գրավատների ցանցը: «Մենք այս տարի բացել ենք գրավատների ցանցի ևս երկու մասնաճյուղ, իսկ երկու մասնաճյուղի շինարարությունն այս պահին ընթացքի մեջ է: Ընդհանուր առմամբ, տարին բիզնեսի համար որքան բարդ, այնքան էլ զարգացման տարի էր»,- «Արմենպրես»-ի հաղորդմամբ՝ ընդգծեց Բադալյանը՝ հավելելով, որ իրենց ղեկավարած «Բեթ կոնստրակտ» ընկերությունը ստեղծում և արտահանում է համակարգչային ծրագրեր, ընկերությունն ունի 200 աշխատող:

Նրա խոսքով՝ 2015թ. Եվրասիական տնտեսական տարածքում առկա ճգնաժամի պայմաններում Հայաստանը կարողացել է իրավիճակը հաղթահարել մինիմալ ցնցումներով: «Ամենակարևորն այն է, որ մենք կարողացանք խուսափել դրամի արժեզրկումից, ինչի արդյունքում հնարավոր եղավ զերծ մնալ տնտեսության մեջ խոշոր ցնցումներից, ինչը, օրինակ, չկարողացան անել Ադրբեջանը և Ռուսաստանը, որտեղ ազգային արժույթի լուրջ արժեզրկում է եղել և լուրջ խնդիրների առաջ են»,- հավելեց գործարարը:

Նա կարևորեց յուրաքանչյուր տարվա վերջում ՀՀ նախագահի հետ ավանդական հանդիպումները, որոնց ընթացքում անկեղծ քննարկումներ են լինում բիզնես միջավայրում առկա խնդիրների, գործարարներին հուզող հարցերի վերաբերյալ: