Գալիք տարի Հայաստանում կստեղծվեն նոր ջերմոցներ

Հայաստանում գյուղատնտեսության ոլորտի առաջընթացի համար կարևոր նախապայման է ջերմոցային տնտեսությունների զարգացումը: Տարեվերջյան ամփոփիչ ասուլիսի շրջանակներում լրագրողների հետ հանդիպմանն այս մասին ասաց ՀՀ գյուղատնտեսության նախարար Սերգո Կարապետյանը: «Եթե նկատել եք, անցյալ տարի մեր երկրում մոտավորապես 82 հեկտար նորագույն տեխնոլոգիաներով ջերմոցային տնտեսություններ ստեղծվեցին: Այդ գործընթացը շարունակական է լինելու»,-նշեց նախարարը:

Սերգո Կարապետյանը հավելեց, որ եկող տարվա համար մի քանի կազմակերպություններ ևս ցանկություն ունեն նորագույն տեխնոլոգիաներով ջերմոցային տնտեսություններ ստեղծել: «Նրանք արդեն ունեն նախագծերը, և արդեն կարող ենք ասել, որ Կոտայքի և Արարատի մարզերում 50 հեկտարի վրա եկող տարի նոր ջերմոցային տնտեսություններ կստեղծվեն՝ հագեցած նորագույն տեխնոլոգիաներով»,- նշեց նախարարը:

Ջերմոցների ստեղծմամբ հնարավոր է եղել լուծել բանջարեղենի սեզոնայնության հարցը: «Եթե դուք նկատել եք, այս տարի մեր շուկաներում վաճառվել է տեղական արտադրության լոլիկ և վարունգ: Ամբողջ տարվա ընթացքում ներկրվել է ընդամենը 24 տոննա լոլիկ և 180 տոննա վարունգ: Նախորդ տարիներին այդ թվերը տասնապատիկ անգամ ավել էին: Իսկ այս տարի մենք ջերմոցների շնորհիվ կարողացանք լրացնել ոչ միայն տեղական շուկայի պահանջարկը, այլ նաև արտահանում կազմակերպել: Ջերմոցային արտադրության 4000 տոննա վարունգ է արտահանվել այս տարի, և այդ գործընթացը շարունակվում է: 2 հազա ր 600 տոննա էլ լոլիկ ենք արդեն արտահանել»,- եզրափակեց նախարարը: