Ամերիկացիները շրջվել են Էրդողանի դեմ

Ամերիկյան The New York Times թերթը հրապարակել է հոդված, որում մեղադրում է Թուրքիայի նախագահ Ռեջեփ Թայիփ Էրդողանին, որ նա հատել է գիծը՝  հիշատակելով «նացիստական Գերմանիան» լրագրողների հետ զրույցում: Ամերիկացի լրագրողների կարծիքով՝ թուրք առաջնորդի նման պահվածքն, արդեն ոչ մեկին չի զարմացնում, քանի որ Էրդողանն ունի առաջնորդի համբավ, որը հակված է մարդու իրավունքները, քաղաքացիների քաղաքական ազատությունը, օրենքի գերակայությունն ու խոսքի ազատությունն արհամարհելուն:

Հոդվածի հեղինակը նշել է, որ իշխանության օրոք տասը տարվա ընթացքում Էրդողանն օգտագործել է նախ և առաջ իր նախարարական, այնուհետև՝ նախագահական լիազորությունները՝  ԶԼՄ-ներին, արհմիություններին և իր բոլոր մրցակիցներին ճնշելու համար:

Թուրքիայում վերջին ընտրություններից հետո, որտեղ Էրդողանի Արդարություն և զարգացում կուսակցությունը (ԱԶԿ) հաղթեց, հաստատվեցին վատագույն մտավախությունները, գրում է թերթը: Նույնիսկ նախքան ընտրությունները, Էրդողանը վերսկսել է պատերազմը Քրդական բանվորական կուսակցության դեմ՝ նպատակ ունենալով բարձրացնել իր վարկանիշը, իսկ հետո անցել է Դեմոկրատական ժողովրդական կուսակցության վրա հարձակմանը, որը հնարավորություն է ստացել պաշտպանել ազգային փոքրամասնությունների իրավունքները, որոնց թվում էին նաև քրդերը:

Ամերիկյան պարբերականը  նշում է, որ Թուրքիայի դաշնակիցները, այդ թվում՝ ԱՄՆ-ը, պարզապես ոչինչ չեն արել և հետևում էին թուրք զինծառայողների դաժանություններին:

Բացի այդ, պարբերականն ընդգծել է, որ Էրդողանին ընդհանրապես չի հետաքրքրում «Իսլամական պետություն» ծայրահեղական խմբավորման դեմ պայքարը: Դրա պատճառով լարվածությունը տարածաշրջանում աճում է: