Լիտվինենկոյին սպանել են «հավանաբար» Պուտինի հավանությամբ. CNN

Լոնդոնի բարձրագույն դատարանի դատաքննիչ սըր Ռոբերթ Օուենը հանրային հարցման արդյունքների հիման վրա հայտնել է Անվտանգության դաշնային ծառայության նախկին սպա Ալեքսանդր Լիտվինենկոյի սպանության մեղավորների անունները՝ Անդրեյ Լուգովին և Դմիտրի Կովտունին: Բացի այդ, դատաքննիչն ասել է, որ հանցագործությունը, «հավանաբար», կատարվել է Ռուսաստանի նախագահի հավանությամբ: Ինչպես զգուշացրել է CNN-ի թղթակիցը, այդ հայտարարությունը կհանգեցնի Կրեմլի կողմից կոշտ արձագանքի:

CNN-ի ավագ միջազգային թղթակիցը հայտնել է. «Այն ենթադրությունը, որ նախագահ Պուտինը, հավանաբար, գիտեր դրա մասին, հիմնված է այն փաստի վրա, որ, եթե դա սպանություն է եղել՝ պատվերով սպանություն, ինքը ստիպված կլիներ թույլատրել այն:

Ակնհայտ է, որ դա այդպես է: Եվ դրանով եզրափակվում է քննության հաշվետվությունը: Ես դեռ չեմ տեսել նրան իմ սեփական աչքերով: Սակայն, հավանական է, որ դատաքննիչն այդ եզրափակիչ զեկույցում, այդ պաշտոնական հետաքննության մեջ օգտագործել է հենց այդ խոսքերը:

Իսկապես ընտրված են շատ կատեգորիկ ձևակերպումներ, երբ խոսքն այն մասին է, որ Ռուսաստանի նախագահ Վլադիմիր Պուտինը պատվիրել կամ հավանություն է տվել Ալեքսանդր Լիտվինենկոյի սպանությանը՝ բրիտանական մայրաքաղաքի փողոցներում ռադիոակտիվ թույնով:

Թույլ տվեք հիշեցնել, որ ոչ միայն մեկ մարդուն կյանքից զրկելու իրողությունն է, որ այդ սպանությունն այդքան սադրիչ է դարձնում, նույնիսկ կարող եմ ասել՝ սկանդալային, այլ նաև այն, որ այլ մարդիկ նույնպես վարակվել են ռադիոակտիվ նյութ պոլոնիում-210-ով, շարքային անցորդներ, ովքեր կարող էին շփման մեջ մտնել թունավոր նյութի հետ, չէ՞ որ նրա մասնիկները մնացել են ամբողջ Լոնդոնում և մի շարք այլ երկրներում, որոնց միջով անցել են ենթադրյալ մարդասպաններ Դմիտրի Կովտունն ու Անդրեյ Լուգովոյը:

Զեկույցում ասված է, որ հատկապես նրանք են պատասխանատու Ալեքսանդր Լիտվինենկոյի սպանության համար: Անցյալում նրանք հերքել են բոլոր մեղադրանքները: Սա առաջին դեպքը չէ, երբ նրանց դեմ առաջադրվել են նմանատիպ, նրանց խոսքերով՝ քաղաքական դրդապատճառներով մեղադրանքներ: Բառացիորեն երեկ Վլադիմիր Պուտինի մամուլի քարտուղարը Մոսկվայում հայտարարել է նման մի բան, որ դա «այն թեմա չէ, որը հետաքրքիր է մեզ համար, և գտնվում է մեր օրակարգում»՝ դրանով իսկ փորձելով անտեսել Մեծ Բրիտանիայում այդ գործով հասարակական հետաքննությունը:

Սակայն, զեկույցում Վլադիմիր Պուտինի անունը շոշափվում է որպես, ըստ էության, Ալեքսանդր Լիտվինենկոյի սպանության պատվիրող: Եվ այդ հայտարարությունն, ամենայն հավանականությամբ, կարող է առաջացնել Ռուսաստանի լուրջ արձագանքը: Բացի այդ, հետաքննության արդյունքները նույնպես կստիպեն բրիտանական իշխանություններին արձագանքել: Այդ գործընթացն, ամբողջ պատմությունը զարգանում է դիվանագիտական տեսանկյունից բավական բարդ ժամանակներում, այդ հետաքննությունն, ինքնին դարձել է իր տեսակի մեջ դիվանագիտական գործընթացի պատանդ: Ամեն ինչ տեղի է ունեցել այն ժամանակ, երբ երկու երկրների միջև հարաբերությունները սրվեցին, այդ իսկ պատճառով հետաքննությունը հնարավոր է դարձել:

Բացի այդ, կա ևս մի շատ նուրբ պահ դիվանագիտական հարաբերություններում: Ռուսաստանը և Մեծ Բրիտանիան համագործակցում են այլ արևմտյան երկրների հետ՝ փորձելով գտնել սիրիական հակամարտության քաղաքական լուծում: Այսպիսով, Մեծ Բրիտանիայում արդեն դիմում են իշխանություններին՝ խնդրանքով, որպեսզի շատ չճնշեն Ռուսաստանին՝ հետաքննության արդյունքների հայտարարումից հետո: Սակայն, կկրկնվեմ, որ անձամբ Պուտինին ներգրավված են համարում սպանությանը, և բրիտանական իշխանությունները քիչ հավանական է, որ կկարողանան անտեսել դա»,- եզրափակել է թղթակիցը: