ՏՄՊՊՀ-ն պատրաստ է ԶԼՄ-ներին տրամադրել «Ռոսնեֆտ»-ից գնվող բենզինի գնի մասին ողջ տեղեկատվությունը

ՀՀ տնտեսական մրցակցության պետական հանձնաժողովը պատրաստ է ԶԼՄ-ներին տրամադրել ռուսական «Ռոսնեֆտ»-ի կողմից հայկական «Ֆլեշ» ու CPS ընկերություններին վաճառվող բենզինի գնի վերաբերյալ ողջ տեղեկատվությունը: Այդ մասին կառավարության նիստից հետո լրագրողների հետ զրույցում նշեց ՏՄՊՊՀ նախագահ Արտակ Շաբոյանը: Հարցին, թե ինչ գներով է «Ռոսնեֆտ»-ը բենզինը վաճառում հայկական ընկերություններին ՝ Շաբոյանը պատասխանեց, որ այդ տեղեկատվությունը կարող են տրամադրել, այս պահին ինքը պատրաստ չէ այն ներկայացնել, քանի որ, ըստ ամիսների, գները տարբերվում են: «Դիմեք հանձնաժողովին՝ 1-2 օրվա ընթացքում այդ տեղեկատվությունը կտրամադրենք»,- ասաց Շաբոյանը:

Հարցին, թե ինչո՞ւ է ՌԴ-ում և Վրաստանում գրեթե երկու անգամ բենզինի գինն ավելի ցածր, քան ՀՀ-ում, արդյոք հարկային քաղաքականությունը ևս կապ ունի՞, ՏՄՊՊՀ նախագահը նշեց. «Ռուսաստանի հետ կապված չեմ կարող մեկնաբանություն անել, որովհետև հայկական ընկերությունները ռուսական ընկերություններից են ձեռք բերում բենզինը: Կոնկրետ փաստաթղթերը հստակ կան, ներկայացված են հանձնաժողովին: Իսկ թե ներքին շուկայում ինչպիսին են գները, ես չեմ կարող մեկնաբանել Ռուսաստանի կառավարության քաղաքականությունը՝ ներքին շուկայում վարվող գների վերաբերյալ: Իհարկե, հարկային քաղաքականությունը ևս իր նշանակությունն ու ազդեցությունն է թողնում գնագոյացման վրա: Միաժամանակ, ՀՀ-ում վաճառվող բենզինի վերջնական գնի մեջ նավթի տեսակարար կշիռը կազմում է 8 տոկոս, այսինքն՝ բավականին փոքր: Մենք բենզինը գնում ենք ՌԴ-ից, որտեղ հարկերը ևս մեծ տեսակարար կշիռ ունեն գնի մեջ, բացի այդ, գումարվում են տեղափոխման մեծ ծախսերը: ՀՀ-ում նույնպես բենզինը մեծ չափով հարկվում է, ինչը, բնականաբար, իր ազդեցությունն է թողնում դրա գնի վրա»: