Ուկրաինան պատրաստ է պաշտոնապես պատերազմ հայտարարել Ռուսաստանին. ԶԼՄ-ներ

Ուկրաինան պետք է անպայման ճանաչի ռուս-ուկրաինական պատերազմի գոյությունը՝ միջազգային հանրության կողմից աջակցություն ստանալու համար: Այդ մասին ուկրաինական ԶԼՄ-ներին տված հարցազրույցում հայտարարել է Մինսկի բանակցություններում եռակողմ շփման խմբի, Ուկրաինայի քաղաքական ենթախմբի ներկայացուցիչ Ռոման Բեսմերտնին:

«Բացի նրանից, որ մենք կարող ենք ապավինել օգնությանը, մենք պետք է Ռուսաստանի դեմ լուրջ ու երկարատև դիմակայության պատրաստվենք»,- ասել է Բեսմերտնին:

«Ոչ որպես հակառակորդի, այլ որպես թշնամու հետ: Պետք է սովորական և հասկանալի անվանել այն, ինչ է տեղի է ունենում, քանի որ մենք ռազմագերիներ ունենք: Նրանք շարունակում են ապօրինաբար գերության մեջ մնալ: Առաջնագծում ընթացող մարտերը հակաահաբեկչական գործողություն են, իսկ ՄԱԿ-ի կողմից ձեռնարկված միջոցները՝ մարդասիրական ակցիա: Այստեղից է ծագում միջազգային ուժային բաղադրիչների ներգրավման խնդիրը: Եվ միայն իրերն իրենց անուններով կոչելով՝ մենք կկարողանանք հույս դնել ինչպես եվրոպացիների, այնպես էլ միջազգային հանրության դիրքորոշումների ազնվության և անկեղծության վրա»,- նշել է նա:

Միևնույն ժամանակ, Բեսմերտնին քննադատել է Ռուսաստանին՝ Սիրիայում իր գործողությունների համար՝ գտնելով, որ «սիրիական հարցը» սերտորեն կապված է «ուկրաինականի» հետ:

«Միջազգային հարթակում Ռուսաստանի կողմից արված քայլերը՝ մասնավորապես Սիրիայում, Ղարաբաղում հակամարտությունը վերականգնելու փորձերը, իրավիճակը Մերձդնեստրում և Մոլդովայում, բացարձակապես ապակառուցողական գործողությունները եվրոպական մայրցամաքում, ձախ և աջ-արմատական ուժերի աջակցումը, գործընթացում ռուսական ուղղափառության ներքաշումը, հսկայական տեղեկատվական էքսպանսիան Եվրոպական շուկայում՝ ահա այն խնդիրների շարքը, որոնց շուրջ պետք է մտածել: Եվ առաջին հերթին, պետք է գտնել պատասխանը, թե ինչպես այսօր ռուսական ագրեսիայից պաշտպանել ինտերմարիումի երկրները, քանի որ նրանք առաջինն են աշխարհագրորեն այդ հարվածի տակ ընկնում:

Իմ կարծիքով՝ Եվրոպան երկու ճանապարհ ունի: Կա՛մ ռուս-ուկրաինական հակամարտությունը կամրապնդի այն, էլ ավելի կմիավորի, կամ պարզապես կպառակտվի ուկրաինական հարցի վրա»,- ասել է Բեսմերտնին: