Ալիևի սարսափը. «Ճգնաժամի վերջը չի երևում…»

Նավթի գնանկումից և ազգային արժույթի՝ մանաթի գրեթե 100 տոկոսով արժեզրկումից հետո խոր տնտեսական ճգնաժամի մեջ հայտնված Ադրբեջանի նախագահ Իլհամ Ալիևը սկսել է չթաքցնել երկիրը փլուզման առաջ կանգնած լինելու սարսափը:

Ինչպես հաղորդում է «Արմենպրես»-ը' վկայակոչելով ադրբեջանական ԶԼՄ-ները, Թովուզի շրջան կատարած այցին Ալիևը հայտարարել է. «Ճգնաժամը շարունակվում է: Տարվա սկզբին միջազգային համաժողովներին մասնակցելուց հետո այն կարծիքին եմ, որ այս ճգնաժամի վերջը չի երևում»:

Մյունխենի տնտեսական համաժողովում Ալիևը խոստովանել է, որ նավթի հետ կապված ճգնաժամին իրենք սպասում էին 20 տարի հետո, և այժմ անակնկալի են եկել վերջին մեկ տարում նավթի գների մոտ 3 անգամ անկումից:

Ալիևը նաև հայտնել է, որ չնայած 2016 թվականի բյուջեում նավթի գինը մեկ բարելի դիմաց հաշվարկել են 50 դոլար, սակայն, այժմ պատրաստվում են փոփոխություն մտցնել բյուջեում և այն դարձնել 25 դոլար:

Այդուհանդերձ, Ալիևը ներկաներին «հավատացրել» է, որ անցյալ տարվա համեմատ անգամ մոտ 3.5 անգամ կրճատված բյուջեով իրենք «կկարողանան տնտեսական աճի հասնել ագրարային, արդյունաբերական և վերամշակման հատվածների զարգացման հաշվին»:

Նավթի համաշխարհային գների՝ անցյալ տարվա կեսերից սկսված շարունակական նվազումը նավթի «ասեղի» վրա նստած Ադրբեջանին կանգնեցրել է խոր տնտեսական փլուզման շեմին: Նավթի գնանկումը սեղմել է «կոճակը» Ադրբեջանի քաղաքական իշխանության դեմ:

Մանաթի լողացող փոխարժեքի անցնելու հետևանքով ամերիկյան դոլարի նկատմամբ դրա գրեթե երկու անգամ արժեզրկվելու հետ կապված՝ բոլոր ապրանքների, այդ թվում սննդամթերքի, գների 50 տոկոսից ավելի աճից հետո երկրի ամբողջ տարածքում թանկացումների դեմ սկսված բողոքի զանգվածային ակցիաները ցնցել են նավթադոլարների առատությունից շփացած Ադրբեջանի քաղաքական իշխանությունը: Երկրում աշխատատեղերի զանգվածային կրճատումներ և գործազրկություն է, փակվել են մեծ թվով ձեռնարկություններ և բանկեր: Ադրբեջանի քաղաքական իշխանության դեմ ավազի ժամացույց է գործի դրվել և հետադարձ հաշվարկ սկսվել:

Ադրբեջանական մանաթի աննախադեպ արժեզրկման արդյունքում այդ երկրում ծայրահեղ վատթարացել է սոցիալ-տնտեսական դրությունը, ինչը երկրի շրջաններում զանգվածային բողոքի ակցիաներ է առաջացրել: Որոշ տվյալներով' Բաքվի «սև շուկայում» ամերիկյան մեկ դոլարը վաճառվում է արդեն 3-4 մանաթով:

Ադրբեջանի արտահանման 95 տոկոսը կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձևավորվում է էներգակիրների արտահանումից ստացվող եկամուտների հաշվին: