Միշտ Պուտինն է մեղավոր. Արևմուտքը՝ Ռուսաստանի դեմ. Der Spiegel

Այստեղ է լուսավոր Եվրոպան, որտեղ խաղի կանոնները թելադրում են դեմոկրատները, իսկ այնտեղ՝ մութ Ռուսաստանը, որը ղեկավարում է իշխանության ծառավ դևը: Ենթադրվում է, որ մեր ժամանակների բոլոր դժբախտություններում մեղավոր է Ռուսաստանի նախագահը: Սակայն ամեն ինչ այդքան հեշտ չէ: Այս մասին Der Spiegel թերթում գրում է Յակոբ Աուգշթայնը:

Մտնում ես համացանց՝ այնտեղ Պուտինն է: Թերթ ես բացում՝ կրկին Պուտինն է: Հեռուստացույցով՝ Պուտինը: Եթե ինչ-որ տեղ Եվրոպայում որևէ քար շրջես, ամենայն հավանականությամբ, Պուտինին կբախվես: Սկսած Ուկրաինայի հակամարտությունից, վերջացրած միգրացիոն ճգնաժամով և Pegida շարժումով: ՌԴ նախագահին մեղադրում են ամեն ինչում, եթե մայրցամաքի ինչ-որ հատվածում մի բան այն չէ: Շուտով կասեն, որ Անգելա Մերկելի սանրվածքի մեջ նույնպես նա է մեղավոր: Պուտինն ուրվականի պես է: 

Սակայն, ինչպես բոլոր մյուս ուրվականների համար, Պուտինի համար նույնպես կանոններ են գործում. Պուտինին, որին մենք ամենուր տեսնում ենք, մենք ինքներս ենք հորինում: «Պուտինին հասկացողները»՝ մի արտահայտություն է, որը որոշ ժամանակ առաջ է հայտնվել և գրավել է աշխարհի ուշադրությունը: Ուկրաինական ճգնաժամի ընթացքում այդպես էին կոչում նրանց, ովքեր չնայած արևմտյան օրենսգրքին՝ աջակցել են Ռուսաստանի նախագահին՝ ասելով, որ նա այս կամ այն կերպ իրեն խելամիտ է պահում, ինչպես մենք բոլորս:

Այն ժամանակ Պուտինն Արևմուտքին «խենթ» էր թվում՝ միջազգային քաղաքականության հարթակում: Անգելա Մերկելը հայտարարել է, որ նա ապրում է իր «սեփական աշխարհում»: Այս ամենն անցյալում է: Այսօր Պուտինը պարզապես դև է դարձել: