Խաղողի օղու արտադրության ծավալների մեծացման համար տուրքը 15 մլն դրամից իջեցվեց 50 հազար դրամի

ՀՀ գործող օրենսդրությամբ խաղողի օղիների արտադրության իրականացման իրավունք ձեռք բերելու համար սահմանված տարեկան տուրքի դրույքաչափը կազմում է 15 մլն դրամ: Այդ պատճառով Հայաստանում խաղողի օղի գրեթե չի արտադրվում: Գինու առանձին տեսակների (աղանդերային, կիսաաղանդերային, խերեսային, պորտվեյն, մադերա և այլն) արտադրության տեխնոլոգիայով պահանջվում է դրանց ավելացնել բացառապես խաղողի օղի, մինչդեռ խաղողի օղու բացակայության պատճառով ավելացվում է ցորենի օղի, որն արգելված է ԵՄ և ՌԴ օրենսդրությամբ: Մյուս կողմից գինու արտադրությամբ զբաղվող տնտեսավարողները հնարավորություն չեն ունենում օղու արտադրության նպատակով թորելու գինու արտադրության համար ոչ պիտանի գինենյութը, վերամշակելու բավականին մեծ ծավալ (շուրջ 25%) կազմող մնացորդները, ինչպես նաև իրականացնելու խաղողի մի շարք սորտերի մթերումներ, որոնք չեն մթերվում գինու և կոնյակի արտադրության նպատակով:

ԼՈւՐԵՐ.com-ի տեղեկացմամբ՝ առաջացած խնդիրները լուծելու նպատակով կառավարությունն այսօր որոշեց նվազեցնել խաղողի օղու արտադրության տուրքը՝ տարեկան 15 մլն դրամից իջեցնելով 50 հազար դրամի:

Հովիկ Աբրահամյանը նիստի ժամանակ արձագանքելով նախագիծը ներկայացնող գյուղատնտեսության փոխնախարար Գրիշա Բաղյանին՝ ասաց, որ սա շատ լավ նախաձեռնություն է, որը կնպաստի խաղողի օղու արտադրության ծավալների մեծացմանը և խաղողի այլ տեսակների մթերմանը, որոնք մինչև այս դժվարությամբ էին մթերվում:

Ըստ կառավարության կանխատեսումների՝ այս կերպ մոտ 20 արտադրող ընկերություն կավելանա, և կլուծվեն խաղողագործության խնդիրները: