Ռուսաստանին ու Թուրքիային Ադրբեջա՞նը կհաշտեցնի. EurasiaNet

Ադրբեջանը փորձում է դուրս գալ դիվանագիտական ծուղակից, որում նա հայտնվել է՝ իր հիմնական ռազմավարական դաշնակցին՝ Թուրքիային Ռուսաստանի հետ հաշտեցնելով, որի հետ Բաքվին միավորում է ընդհանուր խորհրդային անցյալը: Սակայն, փորձագետները կարծում են, որ Բաքուն ավելի շուտ կխորտակվի աճող ռուս-թուրքական դիմակայության մեջ, քան կհասնի Մոսկվայի և Անկարայի միջև հաշտեցմանը: Այս մասին գրում է EurasiaNet-ը:

Նախորդ տարվա նոյեմբերին Թուրքիայի կողմից ՌԴ ռազմաօդային ուժերին պատկանող ինքնաթիռի ոչնչացումից հետո՝ ռուս-թուրքական հարաբերությունները թեքված հարթության վրա են գլորվում:

«Թուրքիայի և Ռուսաստանի միջև հարաբերություններում տիրող ներկայիս իրավիճակը գոհացուցիչ չէ Ադրբեջանի համար,- The Business Year ամսագրին տված հարցազրույցում հայտարարել է Ադրբեջանի արտգործնախարար Էլմար Մամեդյարովը: - Ավելորդ է ասել, որ ինչպես Թուրքիան, այնպես էլ Ռուսաստանը կարևոր դեր են խաղում Հարավային Կովկասի տարածաշրջանում և դրա սահմաններից դուրս անվտանգության և կայունության պահպանման գործում»:

Փետրվարի 3-ին Բաքվում կայացած մամուլի ասուլիսի ժամանակ Մամեդյարովը հայտարարել է, որ Ադրբեջանը հարաբերությունների կարգավորման շուրջ բանակցություններ է վարում երկու երկրի պաշտոնյաների հետ: «Մենք ամեն ինչ անելու ենք, որպեսզի ելք գտնենք այս ճգնաժամից»,- մեջբերում ՏԱՍՍ լրատվական գործակալությունը նրա խոսքերը:

Հայտնի չէ, թե Մոսկվայի և Անկարայի միջև հակամարտության կարգավորմանն ուղղված ինչ կոնկրետ միջոցներ են ձեռնարկում ադրբեջանցի պաշտոնյաները: Նախքան տվյալ հոդվածի հրապարակումը՝  Ադրբեջանի արտաքին գործերի նախարարությունը չի պատասխանել EurasiaNet.org-ի՝ վերոնշյալ բանակցությունների վերաբերյալ հարցերին: Այդ առնչությամբ ոչ մի հավելյալ տեղեկություն չի հրապարակվել: