Samsung-ը ներկայացրեց S7 շարքի սմարթֆոնները

Samsung ընկերությունը Բարսելոնի Mobile World Congress ցուցահանդեսում կազմակերպել է իր Galaxy S7 և Galaxy S7 Edge նոր սմարթֆոնների շնորհանդեսը, տեղեկացնում է «Արմենպրես»-ը:

Իր նոր սարքերում Samsung-ը պահպանել է մի շարք գծեր: Դրանց թվում են մետաղե և ապակյա պատյանը, պաշտպանությունը ջուրն ընկնելիս:

S7 ընտանիքը կաշխատի Android Marshmallow-ի վերջին տարբերակով:

5,1 դյույմ անկյունագծով դիսփլեյն ունի 1440 առ 2560 փիքսել լուծաչափ: Կախված վաճառքի երկրից՝ ներքին հիշողությունը կպարունակի 32 կամ 64 գիգաբայթ տեղեկատվություն: Բացի դրանից, կա MicroSD հիշողության քարտերի միջոցով այն մինչև 200 գիգաբայթ ընդլայնելու հնարավորություն:

12 մեգափիքսելանոց խցիկը գրեթե դուրս չի գալիս պատյանի մակերևույթ:

Մարտկոցի ծավալը մեծացել է մինչև 3000 մԱժ՝ նախորդ սերնդի 2550 մԱժ-ի համեմատությամբ:

Սմարթֆոնները մատչելի կլիեն երկու գույնով՝ «սև օնիքս» և «ոսկեգույն պլատինային»:

Նոր սմարթֆոնները վաճառքի կհանվեն մարտի 11-ին: Նախապատվերը մատչելի է փետրվարի 23-ից:

Բարսելոնում նաև ներկայացվել է Gear VR սաղավարտը, որն աշխատում է S7 շարքի երկու սմարթֆոնների հետ, հաղորդել է «Ինտերֆաքս»-ը: