Թուրքիան Ռուսաստանին բացահայտորեն սպառնացել է պատերազմով. Deutsch Türkische Nachrichten

Թուրքիան բացահայտորեն սպառնում է Ռուսաստանին պատերազմով», գրում է Deutsch Türkische Nachrichten-ը: Ինչպես պնդում է պարբերականը, Անկարան Ռուսաստանին անուղղակիորեն ահաբեկչական կազմակերպություն է ճանաչել, և «սպառնացել Սիրիայում ռուսական զորքերի դեմ ռազմական հարվածներով»:

Թուրքիայի վարչապետ Ահմեթ Դավութօղլուն կտրուկ է արտահայտվել Մոսկվայի հասցեին, նշում է պարբերականը: «Եթե Ռուսաստանը շարունակելու է իրեն որպես ահաբեկչական կազմակերպություն դրսևորել, և ստիպելու է խաղաղ քաղաքացիներին փախչել՝ մենք չափազանց ուժեղ պատասխան կտանք»,- ասել է նա: Բացի այդ, Թուրքիայի վարչապետի խոսքով՝ Ռուսաստանն ու «այլ ահաբեկչական կազմակերպությունները» «մարդկության դեմ բազմաթիվ հանցագործություններ են» իրականացնում:

Ավելին՝ Դավութօղլուն զգուշացրել է, որ Թուրքիան չի դադարեցնի իր գործողությունները սիրիացի քրդերի դեմ, և որ Սիրիայի Ժողովրդական ինքնապաշտպանության ջոկատները չեն կարողանա անցնել Եփրատը: Ռուսաստանը, իր հերթին, հանդիմանել է Թուրքիային՝ քրդական աշխարհազորի և սիրիական կառավարական ուժերի վրա հարձակման համար, ինչպես նաև միջազգային ահաբեկչության աջակցության համար, ասվում է հոդվածում:

Ինչպես գրում է Deutsch Türkische Nachrichten-ը, Թուրքիայի խնդիրն այն է, որ «Էրդողանի կառավարությունը չի կարող կանգնեցնել Ռուսաստանին՝ ամպագոռգոռ հայտարարություններով»: