Վաշինգտոնը տեխնոլոգիական ընկերություններին խնդրել է օգնել սոցցանցերում ԻՊ-ի դեմ պայքարում. CNN

ԱՄՆ-ի վարչակազմն առաջատար տեխնոլոգիական ընկերությունների օգնությանն է դիմել այն հրապարակումների տարածման դեմ պայքարելու գործում, որոնք սոցիալական ցանցերում զետեղում են «Իսլամական պետություն» (ԻՊ) ահաբեկչական խմբավորման կողմնակիցները: Ինչպես տեղեկացնում է «Արմենպրես»-ը, փետրվարի 24-ին այս մասին հայտնել է CNN ամերիկյան հեռուստաընկերությունը:

Հեռուստաընկերության աղբյուրների տեղեկություններով՝ ԱՄՆ-ի արդարադատության նախարարության ներկայացուցիչներն արդեն, մասնավորապես, հանդիպումներ են ունեցել Apple, Twitter, Snapchat, Facebook ընկերությունների, Buzzfeed ինտերնետ-հրատարակության և MTV ալիքի ղեկավարության հետ:

«Օբամայի վարչակազմը մտադիր է ակտիվացնել պայքարը սոցիալական ցանցերում ԻՊ-ի հաղորդագրությունների տարածման դեմ, դրա համար նա հավաքում է տեխնիկական մասնագետների «երազանքի թիմի» նման մի բան, որը համացանցում կհակազդի խմբավորմանը»,- ասված է CNN-ի հրապարակման մեջ, հաղորդել է ՏԱՍՍ-ը: