ՌԴ-ն ավելի ագրեսիվ ու անկանխատեսելի է իրեն դրսևորում. Նորվեգիայի ԱԳ նախարար

Եթե 2014 և 2015 թթ. ծանր են եղել Նորվեգիայի արտաքին քաղաքականության համար, ապա 2016 թ. ավելի դժվար կլինի, նորվեգացի խորհրդարանականներին զգուշացրել է երկրի արտաքին գործերի նախարար Բորգե Բրեդենը: Հիմնական մարտահրավերների թվում նա նշել է իրավիճակը Մերձավոր Արևելքում, միգրացիան, ԵՄ-ում աճող պառակտումն ու իրավիճակը Ռուսաստանում, գրում է BarentsObserver-ը:

Ռուսաստանը դարձել է ավելի հաստատակամ ու անկանխատեսելի, ինչպես Նորվեգիայից դեպի արևելք, այնպես էլ Սիրիայում, և ավելի պատրաստակամորեն, քան երբևէ, գնում է անսպասելի քայլերի ու ռիսկերի, իր դիտարկումներով կիսվել է նորվեգացի նախարարը: Մոսկվան շարունակում է հեռանալ ժողովրդավարական և ազատական արժեքներից, և իր հյուսիսային շրջաններում ռազմական ուժերի ընդլայնումը մեծ զգոնություն է պահանջում Օսլոյում: 

Միևնույն ժամանակ, նորվեգացի քաղաքական գործիչը հակասություններ չի տեսնում իր հայտարարության մեջ, կապված այն բանի հետ, որ բազմազգ հարաբերություններում պետք է ավելի կոշտ դրսևորել իրեն Մոսկվայի հետ, իսկ երկկողմանիներում՝ բարեկամական, նշում է պարբերականը: «Մենք հանդես ենք գալու փոխգործակցության և շփման համար այնտեղ, որտեղ կան ընդհանուր շահեր, և շարունակելու ենք պաշտպանել մեր սեփական արժեքները, սկզբունքներն ու շահերը»,- ասել է նա: Նա նաև ընդգծել է, որ Ռուսաստանը ու Նորվեգիան առանցքային դեր են խաղում Արկտիկայի թեմայում, գրում է BarentsObserver-ը: