Տիգրան Սարգսյանը ԵԱՏՄ միասնական շուկայի ստեղծման իրական քայլերի անհրաժեշտություն է տեսնում

Եվրասիական տնտեսական հանձնաժողովի (ԵԱՏՀ)՝ մարտի 1-ին կայացած հերթական նիստում, որը ղեկավարել է ԵԱՏՀ-ի Կոլեգիայի նախագահ Տիգրան Սարգսյանը, քննարկվել են առևտրի, ագրոարդյունաբերական համալիրի և տեխնիկական կարգավորման ոլորտների հարցերը:

Բացելով ԵԱՏՀ-ի կոլեգիայի նիստը՝ Տիգրան Սարգսյանն ընդգծել է, որ hանձնաժողովը պետք է ավելի ակտիվ դիրք բռնի եվրասիական ինտեգրման ամրապնդման հարցում: «Եվրասիական տնտեսական միությունում գործընկեր երկրների միջև թերինտեգրումը մարտահրավեր է Միության կայունությանը»,- հայտարարել է ԵԱՏՀ-ի Կոլեգիայի նախագահը:

ԵԱՏՀ-ի Կոլեգիան հավանություն է տվել երկու փաստաթղթի, որոնք անհրաժեշտ են Եվրասիական տնտեսական միությունում բժշկական արտադրանքի ընդհանուր շուկայի լիաֆորմատ գործարկման համար: Խոսքը վերաբերում է բժշկական արտադրանքի կենսաբանական գործողության գնահատման նպատակով հետազոտությունների (փորձարկումների) անցկացման Կանոններին և ԵԱՏՄ-ի անդամ պետությունների լիազոր մարմինների կողմից մարդկանց կյանքին ու առողջությանը վտանգ ներկայացնող բժշկական արտադրանքի, անորակ, կեղծ մակնշված և կեղծված բժշկական արտադրանքի կիրառման կասեցման կամ արգելման և ԵԱՏՄ-ի անդամ պետությունների տարածքում դրանց շրջանառությունը բացառելու կարգին:

Առաջին փաստաթղթով սահմանվում են, օրինակ, գործելակերպի պարտադիր կանոնները բժշկական արտադրանք թողարկողների և նրանց լիազոր ներկայացուցիչների համար՝ բժշկական արտադրանքի փորձարկումներ անցկացնելու վերաբերյալ դիմումներ ներկայացնելիս, լիազոր կազմակերպությունների համար՝ բժշկական արտադրանքի փորձարկումներ անցկացնելիս, Միության երկրների լիազոր մարմինների համար՝ կազմակերպությունները լիազոր կազմակերպությունների միասնական ռեեստրում ներառելիս:

ԵԱՏՄ-ի երկրներում բժշկական արտադրանքների պետական գրանցում կատարելիս՝ դրանք Միության ընդհանուր շուկա թույլատրելու նպատակով, գործում են դրանց անվտանգության, որակի և արդյունավետության գնահատման ընթացակարգեր:

Բժշկական արտադրանքի շրջանառության միասնական սկզբունքների ու կանոնների վերաբերյալ միութենական Համաձայնագրի համաձայն, բժշկական արտադրանքի համապատասխանության հաստատման ձևը դրա գրանցումն է ԵԱՏՄ-ի պետության լիազոր մարմնի կողմից: Գրանցման ընթացակարգ չանցած բժշկական արտադրանքը չի թույլատրվում շրջանառության մեջ դնել Միության շուկայում: Գրանցման նպատակով կատարվում են նաև բժշկական արտադրանքի կենսաբանական գործողության գնահատման հետազոտություններ (փորձարկումներ):

Սակայն այժմ կազմակերպչական մոտեցումները, բժշկական արտադրանքի փորձարկումների անցկացման և դրանց արդյունքների ձևակերպման նկատմամբ պահանջները ԵԱՏՄ-ի պետություններում տարբեր են: Դա թույլ չի տալիս պատշաճ կերպով իրականացնել անցկացված հետազոտությունների արդյունքների փոխադարձ ճանաչումը և գրանցել բժշկական արտադրանքը՝ միասնական միութենական շուկայում շրջանառության մեջ դնելու համար:

Միության համար բժշկական արտադրանքի փորձարկումների անցկացման միասնական կանոնների սահմանումը թույլ է տալիս վերացնել այդ խնդիրները: Կարևոր է նաև այն, որ Կանոնները կապահովեն հիվանդների և բուժհիմնարկների անձնակազմի կողմից բժշկական արտադրանքի կիրառման անվտանգության հաստատումը:

Բժշկական արտադրանքի վերաբերյալ մյուս փաստաթուղթը, որը հավանության է արժանացել ԵԱՏՀ-ի Կոլեգիայի կողմից, ԵԱՏՄ-ում սահմանում է միութենական երկրների լիազոր մարմինների կողմից բժշկական արտադրանքների կիրառման կասեցման կամ արգելման և դրանք շրջանառությունից բացառելու միջոցառումների միասնական կարգը:

Այսօր ԵԱՏՄ-ի պետություններում մարդկանց կյանքին և առողջությանը վտանգ ներկայացնող բժշկական արտադրանքի, անորակ, կեղծամակնիշ կամ կեղծված բժշկական արտադրանքի համար արգելիչ միջոցառումները տարբերվում են: Դա թույլ չի տալիս արդյունավետորեն իրականացնել նման արտադրանքի կիրառումը կասեցնելու կամ արգելելու միջոցառումները:

Կարգի ընդունումը կօգնի վերացնել այդ հիմնախնդիրը: Բացի այդ, դա կնպաստի բժշկական արտադրանքի միասնական շուկայում ԵԱՏՄ-ում սահմանված անվտանգության և արդյունավետության ընդհանուր պահանջներին համապատասխանող բժշկական արտադրանքի հայտնվելուն:

Կանոններն ու Կարգը պլանավորվում է հաստատել Եվրասիական տնտեսական հանձնաժողովի խորհրդի հերթական նիստում:

ԵԱՏՀ-ի Կոլեգիայի նիստում ներկայացվել է Հանձնաժողովի ագրոարդյունաբերական քաղաքականության դեպարտամենտի հաշվետվությունն անցյալ տարի Եվրասիական տնտեսական հանձնաժողովի և ՄԱԿ-ի Պարենավորման և գյուղատնտեսական կազմակերպության (FAO) միջև փոխըմբռնման հուշագրի շրջանակներում 2015-2018 թվականների համար նախատեսված միջոցառումների պլանի կատարման վերաբերյալ:

Հանձնաժողովն ակտիվորեն գործակցում է այդ հեղինակավոր կազմակերպության հետ: Հիմնական խնդիրը ԵԱՏՄ-ի երկրների և FAO-ի համատեղ նախագծերի իրագործումն է՝ Միության երկրներում գյուղատնտեսության կայուն զարգացման, բնական ռեսուրսների արդյունավետ օգտագործման նպատակով, ներառյալ հողային ու ջրային պաշարները: 2015 թվականին ԵԱՏՀ-ն FAO-ի հետ համատեղ 18 միջոցառում է կազմակերպել ու անցկացրել միջազգային փորձագետների մասնակցությամբ: