Սերժ Թանկյանը ևս միացել է Գյումրիի անօթևաններին օգնելու նախաձեռնությանը (տեսանյութ)

System of a Down ռոք խմբի երգիչ Սերժ Թանկյանն անդրադարձել է Գյումրիում բնակվող մարդկանց ծանր կենսապայմաններին` հայտնելով, որ միացել է նրանց օգնելու նախաձեռնությանը:

Ֆեյսբուքյան իր էջում երգիչը կատարել է հետևյալ գրառումը.

«Ես պարզապես ստացել եմ այս փակ հաղորդագրությունը: 

Օգնեք Գյումրիի անօթևաններին

Հարգելի Սերժ,

Ես համալիր միջոցառումների նախագծի համահեղինակն եմ. դրանք ուղղված են Գյումրիում 13 անօթևանների համար տներ գնելուն: Մենք մի խումբ երիտասարդ ակտիվիստներ ենք, ովքեր ցանկանում են ներդրում անել, քանի որ 1988 թ. ավերիչ երկրաշարժից հետո դեռ կա ավելի քան 4000 ընտանիք, որոնք անօթևան են և ապրում են ծանր պայմաններում (տեսանյութն՝ այստեղ): «Ալ Ջազիրա» հեռուստաընկերությունն ուղիղ եթերում ցուցադրել է մեր նախագիծը՝ 40 րոպե տևողությամբ, մենք նաև արձագանք ենք ստացել CNN, BBC, Euronews հեռուստաալիքներից:

Մենք առցանց դրամահավաք ենք կազմակերպել (տե՛ս այստեղ): Շուրջ 20 օրվա ընթացքում արդեն հավաքվել է 12,500 ֆունտ: Մենք նաև աճուրդ ենք անցկացնում, որտեղ որպես լոտ ներկայացված կլինեն շատ խորհրդանշական իրեր՝ կապված հայ հայտնի մարդկանց հետ: Նաև բարեգործական համերգներ, միջոցառումներ տեղի կունենան:

Այդ գումարները ավտոմատ կերպով կվերադարձվեն ուղարկողներին, եթե 38 օրվա ընթացքում 110.000 ֆունտ չհավաքվի: Ձեր մեկ տեսանյութը, ֆեյսբուքյան էջում կատարված մեկ հրապարակումը կամ խորհրդանշական նվիրատվությունը կարող է շատ բան փոխել»:

Գրառմանը կից ներկայացված է «Ալ Ջազիրա» կայքում զետեղված տեղեկությունը:

Հազարավոր հայեր տեղահանվել են 1988-ին տեղի ունեցած մահաբեր երկրաշարժի հետևանքով: Սակայն ավելի քան 27 տարի անց, ինչո՞ւ են որոշ ընտանիքներ դեռևս ապրում բեռնափոխադրման կոնտեյներներում:

«Ալ Ջազիրան» կփորձի պարզել, թե ինչ է արվում՝ այդ ընտանիքներին օգնելու համար և կքննարկի երկարաժամկետ մարտահրավերները՝ բնական աղետից հետո համայնքները վերաբնակեցնելու հարցում: