Թուրքիան վտարանդի պետություն է դարձել. Independent

Թուրքական կառավարության դաժան գործողությունները՝ սեփական ժողովրդի հանդեպ, Անկարայի կապերը «Իսլամական պետության» ահաբեկիչների հետ և նախագահ Ռեջեփ Թայիփ Էրդողանի բռնատիրական իշխանությունը Թուրքիային լիովին վարկաբեկել են այլ երկրների աչքում, գրում է The Independent-ը: 

Վերջերս իր տված հարցազրույցում Մեծ Բրիտանիայում Թուրքիայի նախկին դեսպան Ունալ Չևիկոզը հայտնել է, թե այժմ ԱՄՆ-ն և միջազգային կոալիցիան Անկարային ոչ թե դաշնակից են համարում, այլ ավելի շուտ բեռ: «Երկիրը վերջնականապես կորցրել է կարևոր խաղացողի դերը տարածաշրջանում, որն ունակ է նպաստել խնդիրների լուծմանն ու հակամարտությունների կարգավորմանը»,- ասել է նա:

Պետության «անկման» մեջ առանցքային դեր խաղաց նրա նախագահը, որը վերջերս չափազանց հաճախ էր անտարբերություն դրսևորում ոչ միայն միջազգային օրենքների, այլև մարդու հիմնական իրավունքների և ազատությունների նկատմամբ՝ համարելով, որ պետության ղեկավարի կարգավիճակը թույլ է տալիս իրեն դնել օրենքի տեղում և միանձնյա որոշել յուրաքանչյուր քաղաքացու ճակատագիրը, ընդգծում է պարբերականը:

Վերջին աղաղակող դեպքը, երբ Էրդողանը հայտնեց, թե չի ճանաչում Ջան Դյունդարի ձերբակալության անիրավականության վերաբերյալ Սահմանադրական դատարանի որոշումը, անցնում է բոլոր սահմանները և նախագահին հասարակության համար ծայրաստիճան վտանգավոր է դարձնում: Էրդողանն ամեն տեղ թշնամիների է տեսնում, և նախագահին վիրավորելու համար մեղադրվող մարդկանց ցուցակն անընդհատ աճում է. «մեղավորների» թվում արդեն հայտնվել են ֆուտբոլի աշխարհի նախկին չեմպիոն, թերթերի խմբագիրներ, գիտնականներ և համալսարանի ուսանողներ: Այսօրվա դրությամբ 1,845 մարդ պատասխանատվության է կանչվել այդ հանցագործության համար, գրում է հոդվածի հեղինակը: