Ո՞ւմ շահերը կբախվեն, եթե «Նաիրիտ» գործարանը հանձնեն ՀՅԴ-ական նախարարին
Տնտեսություն
Եթե նաիրիտցիներով կարողանանք անել այնպես, որ գործարանն Էներգետիկայի նախարարության ենթակայությունից հանեն և տան Էկոնոմիկայի նախարարությանը, ինչպես առաջ էր, ապա կարծում եմ՝ նորանշանակ նախարար Արծվիկ Մինասյանն ամեն ինչ կանի՝ գործարանը վերագործարկելու համար։ ԼՈՒՐԵՐ.com-ի հետ զրույցում այս մասին ասաց «Նաիրիտի» նախկին տնօրեն Կարեն Իսրայելյանը։
«Գիտեք, որ Արծվիկ Մինասյանը պատգամավոր ժամանակ էլ նաիրիտցիների կողքին էր, միշտ հայտարարում էր, որ գործարանը կարող է աշխատել։ Հիմա, եթե կարողանանք այնպես անել, որ գործարանը հանձնեն Էկոնոմիկայի նախարարությանը, ապա Մինասյանն իր խոսքը գետնով չի տա և ամեն ինչ կանի՝ վերագործարկելու համար»,- ասաց Իսրայելյանը:
Նրա խոսքով՝ ճիշտ կլինի, որ Ազգային ժողովում «Նաիրիտի» հարցով ստեղծված ենթահանձաժողովում այս հարցը շտապ քննարկվի. «Այդ ժամանակ պետք է հարց բարձրաձայնվի՝ գործարանն Էկոնոմիկայի նախարարությանը հանձնելու համար։ Դրան զուգեհեռ պետք է աշխատանքներ տարվեն Արծվիկ Մինասյանի հետ։ Թող վերցնի, աշխատեցնի, ինքն արդեն նախարար է, պատգամավոր չէ»։ Գործարանն Էկոնոմիկայի նախարարությանը հանձնելու համար անհրաժեշտ է ընդամենը նախագիծ ներկայացնել կառավարություն, որի հաստատումից հետո գործարանն անցնում է Էկոնոմիկայի նախարարությանը։
Ըստ Կարեն Իսրայելյանի՝ նման որոշումը կարող է շահերի բախման պատճառ դառնալ. «Եթե Դաշնակցությունը վերցրեց գործարանը, աշխատեցրեց, ապա այդ ժամանակ ՀՅԴ-ի իմիջը բավական բարձրանում է։ Դա էլ իր հերթին առաջիկա ընտրություններում կարող է խանգարել։ Սա հեռուն գնացող հարց է։ Այսքան տարի գործարանը եղել է Էներգետիկայի նախարարության ենթակայության տակ ու թալանվել է, հիմա թող փոխանցեն Էկոնոմիկայի նախարարությանը»։
Քրիստինա Աղալարյան
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
