Էրդողանի գլխավոր թուլությունը. New York Times

Կոշտ հայտարարությունները, ագրեսիվ գործողությունները և մշտական պոռոտախոսությունը՝ Թուրքիայի նախագահի իմիջի մի մասն են դարձել: Սակայն պարզվեց, որ Էրդողանն այնքան էլ անվախ ու համարձակ չէ, ինչպիսին որ նա կցանկանար լինել, գրում է New York Times-ը:

Ինչպես և մյուս ավտորիտար առաջնորդները, Էրդողանը նույնպես անում է հնարավոր ամեն բան, որպեսզի ցույց տա իր քաղաքացիներին, թե «ով է այստեղ ամեն ինչի տերը»: Նա վերսկսել է քուրդ անջատողականների դեմ պատերազմը, իր վերահսկողության տակ վերցրել լրատվամիջոցների մի մասը, ուժով իր կողմ քաշել զինվորականներին և ներշնչել ժողովրդին, որ առանց նրա, Թուրքիան ունակ չէ ոչ մի բանի, նշում է հոդվածի հեղինակը:

Սակայն, չնայած թվացող կոշտության՝ Էրդողանը պարզապես փոքրոգի և չափազանց խոցելի է. նա տանել չի կարողանում իր հասցեին արված նույնիսկ ամենաչնչին քննադատությունը: Այդ մասին վկայում է այն փաստը, որ մինչ օրս «նախագահին վիրավորելու համար»՝ Թուրքիայում պատասխանատվության է ենթարկվել շուրջ 2000 մարդ: Այնպիսի տպավորություն է ստեղծվում, կարծես, Էրդողանին հնարավոր է «վնասել» իր հասցեին արված ցանկացած կոպիտ դիտողությամբ:

Այնուամենայնիվ, Էրդողանի ագրեսիայի պատճառներն այդքան էլ սկզբունքային չեն: Նշանակություն ունեն միայն երկրի համար դրա հետևանքները: Թուրքիայի ներկայիս նախագահը՝ մի անխիղճ ու անհանդուրժող կառավարիչ է, ով ապացուցեց, որ ինքը չի հավատում ժողովրդավարությանն ու պատրաստ է ցանկացած միջոցներով գնալ դրա դեմ, եզրափակում է հոդվածի հեղինակը: