Էրդողանը չի բացատրել, թե ինչպես է պատրաստվում օտար երկրում քաղաք կառուցել. Die Zeit

Գերմանական Die Zeit թերթը բացատրել է, թե ինչ է իրականում ընկած Թուրքիայի նախագահ Ռեջեփ Թայիփ Էրդողանի՝ Սիրիայում փախստականների համար քաղաք կառուցելու գաղափարի ետևում:

Նման առաջարկով Էրդողանը ելույթ է ունեցել ԵՄ-Թուրքիա գագաթաժողովից քիչ առաջ, որի ընթացքում քննարկվելու է միգրացիոն ճգնաժամը: Ըստ հոդվածի հեղինակ Լյուդվիգ Գրևենի՝ Անկարան ակնկալում է, որ այս ճգնաժամում իր ցուցաբերած աջակցության համար՝ ԵՄ-ն նրան միլիարդներով կլցնի:

«Առաջին հայացքից հումանիտար թվացող փախստականների քաղաքի հատակագիծը, իրականում, պարզապես մի ծխածածկույթ է և ոչինչ ավելին: Այն պետք է ԵՄ 28 անդամ երկրներից թաքցնի Թուրքիայի իրական մտադրությունները»,- ասել է Գրևենը:

Հեղինակի տեսակետի համաձայն՝ Էրդողանն իր «հանդուգն ծրագրով» փորձում է ոչ թե օգնել փախստականներին, այլ ուրիշ նպատակներ է հետապնդում: Նախ և առաջ նրա նախաձեռնությունը քարոզչություն է. Թուրքիայի նախագահը փորձում է ցույց տալ միջազգային հանրությանը, որ իր երկիրը պատրաստ է շարունակել սիրիացի փախստականներին տեղավորելու գործընթացը: Սակայն, ոչ իր տարածքում:

Բացի այդ, «Փախստականների քաղաք» արտահայտությունը միջազգային հանրության համար ավելի ներդաշնակ է հնչում, քան «պահպանական գոտին», որի ստեղծումն արդեն վաղուց է, ինչ պահանջում է թուրքական կառավարությունը, երբ, ըստ էության, այս քաղաքը ոչ այլ ինչ է, քան նման գոտու ընդլայնված տարբերակը:

Եթե քաղաքը կառուցվի, ԱՄՆ-ի գլխավորած կոալիցիան արդեն չի կարողանա հրաժարվել ոչ թռիչքային գոտի մտցնելուց, ինչը կարող է հանգեցնել ռուսական ինքնաթիռների հետ բախումների, կարծում է Գրևենը:

Մեկ այլ պատճառը, որ Էրդողանը ցանկանում է կառուցել այդպիսի քաղաք՝ Սիրիայի քրդերի ծրագրերը խափանելու հնարավորությունն է, որոնց Անկարան ահաբեկիչներ է համարում, իսկ ԱՄՆ-ն ու Ռուսաստանը՝ աջակցում, նշում է հոդվածագիրը: