Թուրքիան կստիպի Բրյուսելին հաշտվել Մոսկվայի հետ՝ հանուն ոչ թռիչքային գոտու. Stratfor

ԵՄ-ի հետ երկուշաբթի օրը տեղի ունեցած բանակցությունների ժամանակ Թուրքիայի կոշտ դիրքորոշումն ուղղակիորեն կապված է Սիրիայում պատերազմի հետ, գրում է Stratfor-ը: Արդեն մի քանի տարի է` Անկարան ձգտում է ստեղծել ոչ թռիչքային գոտի թուրք-սիրիական սահմանից դեպի հարավ, և Սիրիայի հյուսիսում համատեղ անվտանգության գոտի:

Այդ ծրագրերի իրագործմանը, սակայն, խոչընդոտում է Մոսկվայի «ռազմական միջամտությունը», նշում է պարբերականը: Առանց Ռուսաստանի Դաշնության մասնակցության՝ Միացյալ Նահանգների և Եվրոպական Միության կողմից այդ տեսակի գոտիների ստեղծումը չափազանց վտանգավոր է դառնում, քանի որ «ոչ ԱՄՆ-ն, ոչ էլ ԵՄ-ն ռիսկի չեն գնա՝ պատերազմ սկսել Ռուսաստանի հետ»:

«Հետևաբար, Թուրքիան օգտագործում է միգրացիոն ճգնաժամը, որպեսզի ստիպի Եվրամիությանը համաձայնության գալ Ռուսաստանի հետ, - նշում է Stratfor-ը:- Սակայն, Բրյուսելի համար հեշտ չի լինի կարգավորել հարաբերությունները Մոսկվայի հետ»:

Ըստ պարբերականի՝ այս հարցում խոչընդոտ են հանդիասնում հակառուսական պատժամիջոցները: Գերմանիայի կառավարությունը ստիպված է լինում գործի դնել իր ազդեցությունը, երբ անհրաժեշտ է կանխել Եվրամիության որոշ անդամների՝ «պատժամիջոցների դեմ ապստամբությունը»: Դրանով իսկ մեծանում է պատժամիջոցների հերթական երկարաձգման հավանականությունը:

Այսպիսով, «Սիրիայի՝ նույնիսկ Ուկրաինայի հարցով Ռուսաստանի հետ պայմանավորվելը՝ գնալով ավելի դժվար է դառնում,- ընդգծում է Stratfor-ը:- Եթե պատժամիջոցներն ուժի մեջ մնան, Մոսկվան կարող է հետաձգել Սիրիայի հարցով ԵՄ-ի և Թուրքիայի հետ համագործակցության ցանկացած փորձերը, ինչը, իր հերթին, կարող է ստիպել ավելի շատ մարդկանց փախչել պատերազմից և ապաստան փնտրել Եվրոպայում»: