Էրդողանը Ռուսաստանի դեմ է գնացել վիրավորանքի պատճառով. Financial Times

Թուրքիայի նախագահ Ռեջեփ Թայիփ Էրդողանը կարող էր սրել Ռուսաստանի հետ հարաբերությունները՝ պայմանավորված անձնական դրդապատճառներով: Այս մասին Financial Times թերթում գրում է պատմաբան Նորման Սթոունը:

Ինչպես գրում է նա, Թուրքիայի մայրաքաղաքի բոմոնդում երկար ժամանակ քննարկվում էր այն դեպքը, որը տեղի է ունեցել դեռևս այն ժամանակ, երբ Թուրքիան ու Սիրիան կարող էին հպարտանալ բարիդրացիական հարաբերություններով: Մի անգամ Էրդողանն իր կնոջ հետ որոշել է անցկացնել հանգստյան օրերը Սիրիայի նախագահ Բաշար Ասադի ու նրա տիկնոջ՝ Ասմայի ընկերակցությամբ:

«Ասում են, որ դրանից հետո՝ Ասմա Ասադը ամուսնուն էլեկտրոնային փոստով նամակ է ուղարկել, որում աղաչում էր ամուսնուն այլևս երբեք դա չանել (հանդիպել Էրդողան ամուսինների հետ- խմբ.)», - ասել է պատմաբանը: Այդ ժամանակ տիկին Ասադը բողոքել էր, թե Էրդողաններն անկիրթ ու անճաշակ են. ամուսինը՝ բանդիտ, ով միայն մեկ գիրք է կարդացել, իսկ կինը տարված է շոփինգով, սակայն, այդուհանդերձ, հագնված է անճաշակ ու հնաոճ:

Ինչ է տեղի ունեցել դրանից հետո՝ հայտնի չէ, սակայն Ասմա Ասադի նամակը գրավել է թուրքական հատուկ ծառայությունների ուշադրությունը: Անկարայում խոսում են այն մասին, որ հենց այդ ժամանակ է, որ Էրդողանի մոտ հակակրանք է սկսել առաջանալ, որը վերածվել է սիրիացի նախագահին տապալելու ցանկությանը, հավելում է Սթոունը:

Բաշար Ասադին հաջողվել է փրկվել՝ Ռուսաստանի շնորհիվ, շարունակում է փորձագետը: Այնուհետև թուրքերը խոցել են ռուսական ինքնաթիռը՝  հայտարարելով օդային տարածքի խախտման մասին:

Սթոունի կարծիքով՝ ռուսական ինքնաթիռի հետ իրավիճակում Անկարայի նման կտրուկ գործողությունները, որոնք խաչ են քաշել ռուս-թուրքական համագործակցության երկարամյա պատմության վրա՝ հիմնավորված են ոչ միայն նրանով, որ Թուրքիան՝ որպես պաշտոնական վարկած առաջ է բերել օդային տիրույթի խախտումը: Պատմաբանը կարծում է, որ մի շարք գործոններ համընկել են. Էրդողանի հակակրանքը Ասադի հանդեպ, ում Սիրիայում աջակցել է Ռուսաստանը, ինչպես նաև վիրավորանքի ու զայրույթի զգացումը: