Թուրքիան Էրդողանի օրոք սողացել է մինչև տոտալիտարիզմ. Globe and Mail

Այս ամիսը կհիշվի որպես մի ժամանակ, երբ թուրքական իշխանություններն անցել են բարոյականության «կարմիր գիծը» և սկսել են իրականացնել իսկական տոտալիտար քաղաքականություն, գրում է Globe and Mail-ի սյունակագիր Դուգ Սանդերսը: Հետևաբար, նրա խոսքով՝ Արևմուտքը պետք է հրաժարվի Ռեջեփ Թայիփ Էրդողանի ռեժիմի հետ սերտ հարաբերություններից:

Հոդվածի հեղինակը խոստովանում է, որ Կանադան և նրա դաշնակիցները հիմնականում կախված են Թուրքիայից: Իրաքում և Սիրիայում ռազմական քարոզարշավերը կտապալվեն առանց Անկարայի հետ ակտիվ համագործակցության: Բացի այդ, երկիրը, որն ընդունել է 3 միլիոն սիրիացի ներգաղթյալների՝ առանցքային դեր է խաղում դեպի Եվրոպա փախստականների նոր հոսքի զսպման հարցում:

«Միևնույն ժամանակ, Թուրքիան խնդիր է դարձել: Իսկապես՝ լուրջ խնդիր»,- ընդգծում է լրագրողը: Վերջերս թուրք զինվորներն ու ոստիկանները շրջապատել են երկրի ամենախոշոր, և ըստ որոշ չափանիշների, լավագույն՝ Zaman թերթի գրասենյակը: Նրանք ուժով են գրավել խմբագրությունը՝ դատավորի թույլտվության քողի ներքո, որը նշանակվել է Էրդողանի կողմից: Այժմ պարբերականը, որը հայտնի է իր անկախ կարծիքով, սկսել է կառավարության անկեղծ քարոզչությունը տպագրել:

Պաշտոնական փակումներն ու ձերբակալություններն իրականացվում են իսլամիստական կամ քրդական շարժման դեմ պայքարի մասին հայտարարությունների ներքո: Նախագահ Էրդողանը խոսում է անվտանգության սպառնալիքի մասին, սակայն գործնականում՝ բոլոր այլակարծիք ժողովրդավարական ու հասարակական կազմակերպությունների նմանատիպ ճնշման միջոցով, նա բացարձակ իշխանություն է ձեռք բերում, գտնում է հոդվածագիրը: