Քրեակատարողական վարչության ծառայողը ծանր հանցագործություն է կատարել

ՀՀ հատուկ քննչական ծառայությունում քննվող քրեական գործի նախաքննության ընթացքում հիմնավորվել է, որ ՀՀ արդարադատության նախարարության քրեակատարողական վարչության ծառայող Ռոբերտ Մովսիսյանը կատարել է առանձնապես խոշոր չափերով խարդախություն: Ինչպես տեղեկացրին ՀՔԾ լրատվական ծառայությունից, մասնավորապես , 2010 թվականի ընթացքում ՀՀ արդարադատության նախարարության քրեակատարողական վարչության օպերատիվ բաժնի աշխատակից Ռոբերտ Մովսիսյանը տեղեկացել է, որ ՀՀ ԱՆ «Կոշ» քրեակատարողական հիմնարկում' ՀՀ քրեական օրենսգրքի 175-րդ հոդվածի 3-րդ մասի 1-ին կետով, 2008 թվականի սեպտեմբերի 17-ից դատարանի դատավճռով 9 տարի ժամկետով ազատազրկման դատապարտված և 2010 թվականին արդեն նշանակված պատիժը կրող դատապարտյալ Նիկոլայ Թորոսյանի ծնողները ցանկանում են օրինական ճանապարհով հասնել իրենց որդու' պատժից պայմանական վաղաժամկետ ազատման հարցի լուծմանը:

Ռոբերտ Մովսիսյանը փաստաբանների միջոցով դատական կարգով այդ հարցը լուծելու պատրվակով, Ն. Թորոսյանի ծնողների' Վարդան և Մարինե Թորոսյանների վստահությունը չարաշահելով, առանձնապես խոշոր չափերով գումար հափշտակելու նախնական դիտավորությամբ, 2010 թվականի օգոստոս-հոկտեմբերի ընթացքում՝ տարբեր օրերի, վերջիններիցս խաբեությամբ մաս-մաս ստացել է, իբր, դատապարտյալի ազատման հարցի լուծման համար անհրաժեշտ' 9 մլն 492 հազար 565 ՀՀ դրամին համարժեք 26 հազար 500 ԱՄՆ դոլար գումարը: Ռոբերտ Մովսիսյանը Նիկոլայ Թորոսյանին պատժից պայմանական վաղաժամկետ ազատելու հար ցով որևէ գործողություն չի ձեռնարկել և խարդախությամբ հափշտակել է առանձնապես խոշոր չափերով' 26 հազար 500 ԱՄՆ դոլար գումարը:

Ուրիշի առանձնապես խոշոր չափերով գույքը խարդախությամբ հափշտակելու հանցավոր արարքի համար Ռ. Մովսիսյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով: ՀՀ հատուկ քննչական ծառայությունում ավարտվել է քրեական գործի նախաքննությունը: Գործը մեղադրական եզրակացությամբ հանձնվել է դատավարական հսկողություն իրականացնող դատախազին՝ այն հաստատելու և դատարան ուղարկելու համար: