Ինչո՞ւ է Վրաստանում բենզինն էժան, իսկ Հայաստանում՝ ոչ. Նիկոլ Փաշինյանի հարցը՝ Արտակ Շաբոյանին

Ազգային ժողովում տարեկան զեկույցով հանդես է գալիս ՏՄՊՊՀ նախագահ Արտակ Շաբոյանը: Զեկուցողին բենզինի գների վերաբերյալ հարց տվեց ընդդիմադիր պատգամավոր Նիկոլ Փաշինյանը.

«Լավ կլիներ, եթե բացատրեիք, թե Հայաստանում բենզինի շուկայում ի՞նչ է կատարվում: 2013 թվականին Հայաստանը և Ռուսաստանը կնքեցին համաձայնագրերի փաթեթ, որտեղ նշվում էր, որ Ռուսաստանը Հայաստանին այլևս արտոնյալ պայմաններով է տալու նավթամթերքը: Այսինքին՝ չպետք է կիրառվեր արտահանման մաքսատուրք, սրանից հետո մենք մտանք ԵՏՄ, այսինքն՝ դարձանք մեկ ընդհանուր մաքսային տարածք:

Բայց հիմա մենք ունենք մի իրողություն, որ, օրինակ, Վրաստանում բենզինը Հայաստանից էժան է, ռեգուլյարը Հայաստանում 390 դրամ է, Վրաստանում մոտ 250 դրամ»:

Նիկոլ Փաշինյանը նկատեց նաև, որ Հայաստանում հայտնվել է մի սուբյեկտ՝ «Ռոսնեֆտ Արմենիա» ընկերությունը, որը 2015 թվականի ընթացքում, ըստ պաշտոնական փաստաթղթերի, 15 մլրդ դրամի շահույթ է ունեցել: Եվ հասկանալի չէ, թե ինչ է անում «Ռոֆնեֆտ Արմենիա» ընկերությունը, իր գործառույթը որն է:

Հղում կատարելով մամուլին՝ Փաշինյանն ասաց, որ նշվում է՝ այս ընկերությունն ուղղակի «Ռոսնեֆտ» ընկերությունից բենզինը վերցնում է, վաճառում Հայաստանում ներկրող ընկերություններին, ուրիշ ոչ մի բան չի անում և դրա արդյունքում ստանում է 15 մլրդ դրամի շահույթ:

«Այստեղ ի՞նչ է տեղի ունենում, թվում է՝ արտոնյալ պայմաններում, արտոնյալ տարածքում արտոնյալ գործունեություն ենք իրականացնում տուրքերից և մաքսային այլ խոչընդոտներից զերծ, բայց ստացվում է Վրաստանը, որ բոլորովին ուրիշ միջավայրում է գործում, ավելի էժան բենզին է ստանում:

Կան տուրքերի տեսակներ, որ ենթադրաբար Հայաստանում չեն վճարում, բայց Վրաստանում վճարում են: Եթե այս թնջուկի վերաբերյալ բացատրություններ տայիք, փորձեիք, իսկապես հասկանայինք՝ ինչ է կատարվում, լավ կլիներ»,- Շաբոյանին դիմեց Փաշինյանը:

ՏՄՊՊՀ նախագահն ասաց, որ բենզինի ոլորտը մշտապես գտնվում է հանձնաժողովի ուշադրության կենտրոնում:

Հանձնաժողովի ուսումանասիրության արդյունքներով՝ 2014 թվականին Հայաստանում բենզինի գները նվազել են՝ հասնելով 480-ից 380 դրամի:

Նկատեց, որ հայկական դրամի փոխարժեքը կարևոր նշանակություն ունի վերջնական գների վրա: Այս երկու տարվա ընթացքում մոտ 17-18 տոկոսով հայկական դրամի փոխարժեքն արժեզրկվել է, ինչը նշանակում է, որ դա իր ազդեցությունը պետք է թողնի բենզինի վաճառքի գների վրա: «Եթե հայկական դրամի փոխարժեքի ազդեցությունը հանենք, նայենք դոլարային արտահայտությամբ վաճառքի գները, ապա այս երկու տարվա ընթացքում Հայաստանում բենզինի վաճառքի գները նվազել են մոտ 32 տոկոսով»:

Պատասխանելով Շաբոյանին՝ Նիկոլ Փաշինյանը նկատեց, որ թեպետ ՏՄՊՊՀ նախագահը նշում է՝ չարաշահումներ չկան, բայց մարդիկ Նոյեմբերյանից գնում են Վրաստան՝ բենզին լցնելու: