Թուրքիայի գործողություններին կոշտ արձագանքելու կոչով է հանդես եկել Լավրովը. Press TV

ՌԴ արտաքին գործերի նախարար Սերգեյ Լավրովը միջազգային հանրությունից կոշտ և հստակ արձագանք է պահանջել՝ Սիրիայի տարածքում Թուրքիայի հրետանային հարձակումների վրա, հայտնում է Press TV-ն: Անկարան այդպիսով խափանում է ընդհանուր ջանքերը, որոնք ուղղված են սիրիական ճգնաժամի կարգավորմանը, ընդգծել է Ռուսաստանի ԱԳ նախարարը:

«Դա պահանջում է կոշտ և հստակ պատասխան միջազգային հանրության կողմից: Քանի որ Թուրքիայի գործողությունները, ըստ էության, քայքայում են ջանքերը, որոնք նախաձեռնվում են, այդ թվում՝ ՄԱԿ-ի Անվտանգության խորհրդի հավանությամբ, ինչպես հրադադարի, հումանիտար բեռների մատակարարումների, այնպես էլ քաղաքական գործընթացի մեկնարկի հարցերով»,- ասել է նա:

Լավրովը նշել է, որ ռուս-ամերիկյան նախաձեռնությունը՝ ուղղված Սիրիայում մարտական գործողությունների դադարին, հաջող է անցել՝ «բոլոր ուղղություններով»: Նա հավելել է նաև, որ վերջին շրջանում Սիրիայի հարցով խաղաղ բանակցություններում առաջընթաց է արձանագրել: