Խմբագրական. Մենք քաղաքական ուժ չենք և կարող ենք բանակցել ցանկացած կողմի հետ

Մարտի 18-ին ՀՀ Արդարադատության նախարարության կողմից հրավիրվելով՝ մասնակցեցի Ընտրական օրենսգրքի նախագծի՝ լրատվամիջոցներին վերաբերող կետերի շուրջ քննարկմանը, որը վարում էր նախարար Արփինե Հովհաննիսյանը: Իմ և իմ գործընկերների կողմից հնչած առաջարկները լսելի դարձան, քննարկվեցին, կշարունակեն քննարկվելը և, ամենայն հավանականությամբ, կընդունվեն, մտահոգող հարցերն էլ կստանան իրենց լուծումը: Ահա թե ինչ ասել է՝ կառուցողական մոտեցում: Ես անձամբ կարևորում եմ նման նախաձեռնությունները և մասնակցությունը դրանց: Մանավանդ եթե հարցը վերաբերում է անմիջապես մեր ոլորտին, մեր աշխատանքին, ապա առնվազն անհրաժեշտ է մասնակցել մեզ վերաբերող նախագծերի քննարկմանը, նպաստել, որպեսզի ընդունվեն մեր շահերից բխող որոշումներ, քան խուսափել և հետո էլ էլ բողոքել, թե իրենց իրենց որոշումներ ընդունեցին՝ առանց մեր կարծիքը հաշվի առնելու:

Ես վստահ եմ, որ իմ գործընկերների մեծամասնությունն իրականում կողմ է նման կառուցողական մոտեցմանը: Վերջիվերջո, լրատվամիջոցը քաղաքական կառույց չէ և իրականում չի կարող լինել դիմադիր կամ ընդդիմադիր (ինչպես հաճախ թյուրիմացաբար ասում են՝ աղավաղելով լրատվամիջոցների մասին պատկերացումները), չափավոր կամ ռադիկալ: Խոսքս, իհարկե, չի վերաբերում կուսակցությունների պաշտոնական լրատվամիջոցներին, որոնց դեպքում ընդգծված դիրքորոշումը նորմա է:

Հետևաբար, իմ պատկերացմամբ, լրատվամիջոցի համար չպետք է լինի այնպիսի մոտեցում, թե մենք չենք բանակցի իշխանության կամ որևէ այլ կողմի հետ: Ոչ, մենք քաղաքական ուժ չենք և կարող ենք բանակցել ցանկացած կողմի հետ, թե՛ իշխանական և թե՛ ընդդիմադիր: Նաև այդպիսի բանակցությունների միջոցով մենք հանրության կարծիքը տեղ հասցնողներ ենք, առաջարկներ անողներ ու հարց լուծողներ: Մենք չորրորդ իշխանություն ենք, եկեք չմոռանանք մեր իրական դերը:

Կարեն Վարդանյան