Բելգիան պատահական չդարձավ ահաբեկիչների թիրախ. The Guardian

Բրյուսելում պայթյունները ցնցեցին ողջ Եվրոպան, սակայն զարմանալի չէ, որ հենց Բելգիան դարձավ ահաբեկիչների թիրախ: Այս մասին գրում է The Guardian-ը:

Արմատական ակտիվությունն այդ փոքրիկ երկրում կենտրոնացնելու համար բազմաթիվ նախադրյալներ կային: Դրանցից են մահմեդական փոքրամասնության վատ ինտեգրացվածությունը, գործազրկության բարձր մակարդակը, զենքի ազատ շրջանառությունը, տրանսպորտային և հեռահաղորդակցական ցանցերը, ինչպես նաև քաղաքական անկայունությունը: Այս ամենին պետք է գումարել նաև Բելգիայի իշխանությունների անհրաժեշտ զգոնության բացակայությունը, և այդ ամենը միասին վերցրած հանգեցրել է նախօրեին տեղի ունեցած իրադարձություններին:

The Guardian-ը նշում է, որ ահաբեկչության խնդրի արմատները հասնում են դեռևս 80-90-ական թվականներ, երբ Մերձավոր Արևելքում հուզումներ սկսվեցին: Շատ փորձագետներ նաև հակված են Ֆրանսիայում և Բելգիայում ահաբեկչության սկիզբը կապել Ալժիրում քաղաքացիական պատերազմի հետ:

Նախորդ տասնամյակի առաջին կեսում, երբ ահաբեկիչները հարվածեցին Լոնդոնին և Մադրիդին, Բելգիայում անվտանգության միջոցառումների խստացմանն անհրաժեշտ ուշադրություն չդարձվեց, իսկ ահաբեկիչներն ամրանում էին Եվրոպայում:

Պատերազմը Սիրիայում արագացրեց այդ գործընթացը՝ շարունակում է պարբերականը: Մոտ 500 բելգիացի մեկնել է Մերձավոր Արևելք՝ կռվելու, դա ամենամեծ թիվն է եվրոպական բոլոր երկրների մեջ: Նրանցից շատերն անդամագրվեցին «Իսլամական պետությանը» և «Ջեբհատ ան Նուսրային», հետո արդեն ահաբեկչական հարձակումներին նախապատրաստված վերադարձան Եվրոպա: