Հայաստանի ասորիները ողջունում են խորհրդարանում տեղ ստանալու հնարավորությունը

Հայաստանի ասորիների «Աթուր» միության նախագահ Արսեն Միխայլովը կարևորում է ՀՀ բարեփոխված Սահմանադրության մեջ ամրագված այն դրույթը, որով ազգային փոքրամասնության ներկայացուցիչները պետք է տեղ ունենան խորհրդարանում:

«Արմենպրես»-ի հետ զրույցում Միխայլովը նշեց, որ դա ևս մեկ լավ հնարավորություն է, որից պետք է օգտվեն ազգային փոքրամասնությունները: «Իսկապես, ես շատ կարևորում եմ այդ դրույթը, որովհետև մենք դրանով հնարավորություն ենք ստանալու մեր ներկայացուցիչն ունենալ Ազգային ժողովում: Ճիշտ է՝ դեռ մեխանիզմը վերջնական որոշված չէ, թե ինչպես են ընտրվելու ազգային փոքրամասնությունների ներկայացուցիչները: Ես կարծում եմ, որ Հայաստանի ազգային փոքրամասնությունների ներկայացուցիչնե րը պետք է նաև իրենց վերաբերմունքն արտահայտեն, թե ինչպես պետք է լինի այդ ընտրությունը, և ով պետք է ներկայացնի իրենց խորհրդարանում»,- ասաց Միխայլովը:

Նա հավելեց, որ ասորական համայնքում արդեն 4-5 մարդ կա, ովքեր ցանկանում են լինել Ազգային ժողովում: «Բայց ես կարծում եմ, որ համայնքը պետք է որոշի իր թեկնածուին՝ հաշվի առնելով այն հանգամանքը, թե անցած տարիների ընթացքում ով է իսկապես աշխատել համայնքի համար, ինչ խնդիրներ է լուծել, ինչքան գործ է արել: Ով իսկապես անցած տարիների ընթացքում քրտնաջան աշխատել է, նա էլ արժանի կլինի»,- ընդգծեց Արսեն Միխայլովը:

Ասորիների «Աթուր» միության նախագահը նկատեց, որ Հայաստանում ասորական համայնքն իրեն շատ լավ է զգում, քանի որ երկրում ստեղծված են բոլոր հնարավորությունները ընդհանրապես ազգային փոքրամասնությունների համար: Նրա խոսքով՝ ազգային փոքրամասնությունները պետք է պարզապես օգտվեն իրենց տրված հնարավորություններից, պահեն և զարգացնեն իրենց ազգային ինքնությունը, մշակույթը, նիստուկացը: