Հրադադարի ռեժիմի ինտենսիվ խախտումները քայլ առ քայլ դառնում են ավելի լկտի և սանձարձակ. ԱԺ փոխխոսնակ

ՀՀ Ազգային ժողովի փոխնախագահ Հերմինե Նաղդալյանը խստորեն դատապարտել է ղարաբաղա-ադրբեջանական շփման գծում Ադրբեջանի սադրիչ գործողությունները: Այս մասին տեղեկացնում են ՀՀ ԱԺ փոխնախագահի աշխատակազմից: Ստորև ներկայացնում ենք Հերմինե Նաղդալյանի ուղերձն ամբողջությամբ.

«ԵԱՀԿ Մինսկի խմբի համանախագահների վերջին հայտարարությունները գնալով ավելի հասցեական են դառնում, բայց, կարծում եմ, այլևս ժամանակն է հստակ բարձրաձայնելու և դատապարտելու Ադրբեջանի պահվածքը և քաղաքականությունը՝ իրավիճակի ապակայունացման, խաղաղ բանակցային ճանապարհից հրաժարվելու ուղղությամբ: Հրադադարի ռեժիմի ինտենսիվ խախտումները, հատկապես բարձրաստիճան հանդիպումներից առաջ կամ հետո, քայլ առ քայլ դառնում են ավելի լկտի և սանձարձակ և վերածվում են ծավալուն ռազմական գործողությունների:

Հայաստանյան կողմը բազմիցս հայտարարել է հակամարտության գոտում և շփման գծի վրա զինադադարի խախտումները բացառելու միջազգային մեխանիզմների կիրառման իր պատրաստակամության մասին, մինչդեռ, ի պատասխան, տևական ժամանակ իրենց կողմից մերժվում է այդ պահանջը:

Այսօրվա գործողությունները, իհարկե, աննախադեպ են իրենց ծավալներով, բայց, կարծում եմ, արդյունքում՝ ինչպես նախկինում, այնպես էլ հիմա, մեր պաշտպանական բանակի կողմից ստացել և ստանալու են համարժեք պատասխան և պատժիչ լուրջ գործողություններ:

Ադրբեջանի այս տենդագին ջղաձգումները և նրա նախագահի վերջին մեղադրանքները՝ ուղղված Մինսկի խմբին, ապացուցում են, որ անկյուն քշվածի վիճակում գտնվող հարևան պետությունը հետևողականորեն գնում է սադրանքի և իրավիճակը սրելու ճանապարհով:

Վստահ եմ, մեր զինված ուժերը ունակ են հակառակորդին խաղաղություն պարտադրել:

Կարևոր է, որ միջազգային հանրության և ԵԱՀԿ Մինսկի խմբի համանախագահների կողմից նույնպես գործնական քայլեր ձեռնարկվեն Ադրբեջանին սանձելու համար:

Մենք խորապես ցավում և կիսում ենք զոհերի հարազատների վիշտը և վիրավորներին շուտափույթ ապաքինում մաղթում»: