Ադրբեջանն ընդլայնում էր ռազմական ներկայությունը և սպասում հարմար պահի. ԼՂ-ում պատերազմը կհարվածի Ռուսաստանին և Թուրքիային. CNN

Ռուսաստանը Հայաստանի առանցքային դաշնակիցն է, իսկ Թուրքիան՝ Ադրբեջանի, այնպես որ Լեռնային Ղարաբաղում նոր ռազմական գործողությունները կարող են լուրջ ազդեցություն ունենալ ռուս-թուրքական հարաբերությունների վրա, կարծում է ԱՄՆ փորձագետ Հոուփ Հարիսոնը: Բացի այդ, CNN-ի եթերում նա անվանել է այդ հակամարտության գլխավոր մեղավորին՝ Իոսիֆ Ստալինին, ով, ըստ նրա, Կովկասում միտումնավոր է լարվածության օջախ ստեղծել:

«Ադրբեջանն ընդլայնում էր ռազմական ներկայությունը և սպասում հարմար պահի»,- ասել է նա:

Պատասխանելով լրագրողի հարցին, թե ինչու են նրանք կարծում, որ այժմ հարձակման ճիշտ ժամանակն է, Հարիսոնը նշել է. «Գուցե նրանք գտնում են, որ ամբողջ աշխարհը կենտրոնացել է Եվրոպայում փախստականների ճգնաժամի վրա, և Վաշինգտոնում միջուկային գագաթնաժողովն է անցկացվել: Հնարավոր է՝ նրանք կարծում են, որ համաշխարհային առաջնորդներն այլ խնդիրների մասին են մտածում, և դա հարմար պահ է եղել՝ տարածաշրջանում իրերի դասավորվածությունը փոխելու համար»:

«1920-ական թվականներին՝ նախքան ամբողջ Խորհրդային Միությունը գլխավորելը, Իոսիֆ Ստալինը պատասխանատու էր ազգային քաղաքականության համար: Եվ նա միտումնավոր ստեղծեց Լեռնային Ղարաբաղի հայկական անկլավը Ադրբեջանի տարածքում, այնպես որ այդ երկու խմբերը՝ հայերն ու ադրբեջանցիները չկարողանան լեզու գտնել միմյանց հետ: Դա Խորհրդային Միությունում «բաժանիր և տիրիր» ռազմավարության մասն է եղել:

Այստեղ ամեն ինչ այնքան էլ ակնհայտ չէ: Ռուսաստանն ունի զորքեր այդ տարածաշրջանում՝ Հայաստանում, և այդ երկրի կարևոր դաշնակիցն է: Ռուսաստանին դուր չի գալիս այն փաստը, որ Ադրբեջանը լավ հարաբերությունների մեջ է Արևմուտքի հետ. Արևմուտքը, իհարկե, շահագրգռված է Ադրբեջանից գազի և նավթի մատակարարմամբ: Բայց Պուտինը նույնպես հարաբերություններ է պահպանում Ադրբեջանի հետ: Այնպես որ, նա, անշուշտ, ամենամոտն է այդ երկրներին:

Թուրքիան իրականում շատ մոտ է Ադրբեջանին՝ վերջինիս ամենամտերիմ դաշնակիցն է: Եվ դա, ըստ էության, կբարդացնի իրավիճակը Թուրքիայի և թուրք-ռուսական հարաբերությունների համար»,- ասել է փորձագետը: