Լեռնային Ղարաբաղում հակամարտությունը՝ «ուրիշի ձեռքերով» պատերազմի սկիզբ. Deutsche Welle

Ինչի՞ն կարող է հանգեցնել ԼՂ-ում հակամարտության սրումը: Ի՞նչ դեր են խաղում Ռուսաստանն ու Թուրքիան դրանում: Այդ հարցերի պատասխանները փորձում են տալ գերմանական ԶԼՄ-ների մեկնաբանները:

Քաղաքական լուծումը դեռևս հեռու է

«Լեռնային Ղարաբաղում հակամարտությունը կրկին բռնկելու համար՝ մեծ ջանքեր չեն պահանջվում: Այդպես է եղել այն ժամանակ, երբ հակամարտության անմիջական մասնակից հովանավորների՝ Ռուսաստանի և Թուրքիայի միջև հարաբերությունները դեռ այնքան էլ վատ չէին: Եվ, ավելին՝ դա վերաբերում է այսօրվա իրավիճակին, երբ Մոսկվան և Անկարան ի վիճակի են կատարել առավել նողկալի գործողություններ»,- գրում է Frankfurter Allgemeine Zeitung-ի հոդվածագիր Պետեր Շտուրմը:

Նա հույս է հայտնել, որ «Հայաստանն ու Ադրբեջանը բավարար խոհեմություն կցուցաբերեն, որպեսզի ներկայումս բռնկված մարտերը չվերաճեն երկարատև պատերազմի»: «Ստեղծված հանգամանքներում, դա լավագույնը կլիներ, ինչը կարող է հաջողվել կարճ և երկարաժամկետ հեռանկարում: Քանի որ քաղաքական լուծմանը, որին երկու հանրապետությունները պարտավորվել են շատ տարիներ առաջ, հեռու է ավելի, քան երբևէ»,- ասում է հեղինակը:

Բաքուն պատերազմ բռնկելու իրավունք չունի

«Հին հակամարտություններ, նոր մարտեր»,- այսպես է վերնագրել իր մեկնաբանությունը Tageszeitung թերթում Բերնհարդ Քլասենը: Հեղինակը, մասնավորապես, նշում է, որ Ադրբեջանն ունի դաշնակից՝ Թուրքիան, որը կարող է նրան նաև ռազմական աջակցություն ցուցաբերել: «Հայկական սահմանները հսկում են ռուս զինվորները: Այսպիսով, նոր պատերազմի դեպքում, Լեռնային Ղարաբաղի տարածաշրջանում ռուս զինվորները կկարողանային դիմակայել թուրքերին»,- նախազգուշացնում է Քլասենը հակամարտության սրացման վտանգի մասին:

«Պուտինի և Էրդողանի էգոն»

Die Welt թերթի հոդվածագիր Յուլիա Սմիրնովան նույնպես նշում է Ռուսաստանի և Թուքիայի միջև լարված հարաբերությունների ֆոնին՝ Լեռնային Ղարաբաղում «ուրիշի ձեռքերով» պատերազմի բռնկման վտանգը: «Լեռնային Ղարաբաղում Պուտինի էգոն բախվում է Էրդողանի էգոյին» վերնագրով հոդվածում, հեղինակը նշում է, որ մեծ թվով ծանր զենք ինչպես ադրբեջանական, այնպես էլ հայկական կողմում «աստիճանաբար ճգնաժամային տարածաշրջանը վերածում է վառոդի տակառի»:

«Վերջին բախումները ցույց են տալիս, որ ոչ ոք լիովին չի վերահսկում իրավիճակը Հարավային Կովկասում: Այդ թվում՝ Մոսկվան: Այսպիսով, այս հակամարտությունը երբեք չի կարողանա մնալ լիովին սառեցված»,- եզրափակում է հեղինակը: