Կան պետություններ, որոնք սիլի-բիլի են անում Թուրքիայի և Ադրբեջանի հետ. Շարմազանով

Այսօր Ազգային ժողովում լրագրողների հետ զրույցում ԱԺ փոխնախագահ Էդուարդ Շարմազանովը լրագրողների հետ զրույցում ասաց, որ այսօր սպասվում է ԵԱՀԿ անդամ երկրների նիստը:

Շարմազանովի խոսքով՝ Սերժ Սարգսյանի ուղերձն՝ ուղղված նրանց դեսպաններին, շատ հստակ էր:

«Պարոն նախագահը շատ հստակ նշեց, որ նախևառաջ հրադադարի ռեժիմը և ահաբեկչական գործողությունների հեղինակն Ադրբեջանն է, և դա նրանց դիվանագետները, նույնիսկ նրանց նախագահը չեն թաքցրել:

Երկրորդը՝ Ադրբեջանն ուզի, թե չուզի, պարտավոր է բանակցություն վարել Լեռնայն Ղարաբաղի Հանրապետության հետ, որովհետև 94 թվականի զինադադարի ռեժիմը կնքել են նաև Ղարաբաղի հետ։ Եվ եթե մենք խոսում ենք հրադադարի ռեժիմին անցնելու մասին, ապա կա գործող զինադադարի համաձայնագիր՝ ստորագրված 1994 թվականի մայիսի 12-ին, և կան պետություններ, ովքեր պետք է կլինեն այդ զինադադարի երաշխավորները։ Եթե մենք խոսում ենք զինադադարի մասին, ոչ թե խոսենք նոր զինադադարի մասին, այլ զորքերը պետք է հետ տանել այն կետին, որոնք եղել են ապրիլի 1-ին:

Երրորդը՝ ոչ հասցեական գնահատականներն են, որոնք ոչ միայն չեն օժանդակում, այսօր մեր համոզմամբ՝ խանգարում են, խոչընդոտում են խնդրի կարգավորմանը և նոր թևեր են տալիս ահաբեկչին»,- ասաց Շարմազանովը։

Պատգամավորը հիշեցրեց նաև 1930-ական թվականները, երբ քաղաքակիրթ Եվրոպան, ինչո՞ւ չէ, նաև Խորհրդային միությունը, «սիլի-բիլի» էին անում Ադոլֆ Հիտլերի հետ, մինչև որ Հիտլերը չսկսեց Երկրորդ աշխարհամարտը։

«Հիմա կան պետություններ, ովքեր սիլի-բիլի են անում Թուրքիայի հետ, Ադրբեջանի հետ, և մենք տեսնում ենք, որ թե՛ Թուրքիան, թե՛ Ադրբեջանը ոչ միայն գլխացավանք, այլ լուրջ սպառնալիք են հանդիսանում մեր տարածաշրջանի համար»,- ասաց Շարմազանովը:

Ըստ պատգամավորի՝ նախագահի չորրորդ մեսիջն ուղղված էր հենց Թուրքիային:

Թուրքիան՝ որպես ահաբեկչության հետ կապ ունեցող պետություն, որն արդարացնում է Ադրբեջանի գործողությունները՝ 12-ամյա երեխայի, տարեց մարդկանց դաժանաբար սպանության հարցը, այդ պետությունը որևէ անելիք չի կարող ունենալ կարգավորման գործընթացում»,- նշեց Շարմազանովը։

Շարմազանովը նաև տեղեկացրեց, որ բոլոր պատգամավորները ցանկություն են հայտնել օգնելու Արցախին, ավելին՝ արդեն ուղարկել են, սակայն խնդրել են անուններ չտալ, թեպետ Արցախը որևէ բանի կարիք չունի: