Բողոքի ակցիա՝ Ռուսաստանի, Ֆրանսիայի և ԱՄՆ-ի դեսպանատան դիմաց. պահանջը՝ սաստել Ադրբեջանին

Ապրիլի 1-ից մինչ օրս ադրբեջանական կողմից ակնհայտ հարձակվողական ռազմական գործողություններ են իրականացվում Լեռնային Ղարաբաղի Հանրապետության հետ սահմանի ողջ երկայնքով՝ խախտելով 1994 թվականին կնքված զինադադարի համաձայնագիրը: Օգտագործելով հրետանի, զրահատեխնիկա, համազարկային կրակի ռեակտիվ համակարգեր և օդուժ՝ Ադրբեջանը հրետակոծության է ենթարկում ԼՂՀ խաղաղ բնակավայրերը:

Մի խումբ քաղաքացիներ վաղը՝ ժամը 17։00-ին, պատրաստվում են այս առնչությամբ իրենց դժգոհությունը ներկայացնել ԵԱՀԿ Մինսկի խմբի անդամ երկրների դեսպանատներին՝ ևս մեկ անգամ նրանց երկրների ուշադրությունը հրավիրելով Ադրբեջանի քաղաքականությանը և սադրանքներին։

«Պահանջում ենք ԵԱՀԿ Մինսկի խմբի համանախագահներից և միջազգային հանրությունից.

- հստակ և հասցեական արձագանքել խաղաղ բնակչության նկատմամբ բացահայտ ահաբեկչական գործողություններով ուղեկցվող ադրբեջանական ագրեսիային

- սաստել Ադրբեջանի սանձազերծած ռազմական գործողությունները՝ ստիպելով վերադառնալ բանակցային դաշտ»,- ասված է նրանց հայտարարության մեջ։ 

Քաղաքացիները Մյասնիկյանի արձանի մոտից խաղաղ երթով շարժվելու են՝ սկզբում դեպի Ֆրանսիայի դեսպանատուն, այնուհետև Ռուսաստանի դեսպանատուն, որից հետո՝ ԱՄՆ-ի դեսպանատուն։ Յուրաքանչյուր դեսպանատանը փոխանցելու են իրենց պահանջ-հորդորը նամակի տեսքով: