Լեռնային Ղարաբաղը և տրամադրությունները Կրեմլում. Радио Свобода

Լեռնային Ղարաբաղում ռազմական գործողությունների վերսկսման վերաբերյալ հաղորդումներն ամերիկացի փորձագետների ուշադրությունն են հրավիրել Ռուսաստանի դերի վրա, որը Հայաստանի տարածքում 5000-անոց զինվորական կոնտինգենտ է պահում, և վերջերս այն ընդլայնվել է մարտական ինքնաթիռներով ու ուղղաթիռներով: Մինչ դիտորդները համաձայնում են, որ տարածաշրջանում լուրջ ռազմական հակամարտությունը չի բխում կողմերից ոչ մեկի շահերից, Կրեմլը կարող է գայթակղվել՝ իր օգտին իրավիճակը փոխելով:

Պետդեպարտամենտի նախկին բարձրաստիճան աշխատակից Ջեֆրի Մանկոֆը Christian Science Monitor թերթին տված հարցազրույցում ասել է, որ, իր կարծիքով, Ռուսաստանը շահագրգռված է ոչ միայն այդ տարածաշրջանում խաղաղությամբ, Ռուսաստանը շահագրգռված է «պայմանավորվածությամբ, որը կարող է ամրապնդել իր տարածաշրջանային ազդեցությունը» և՛ Հայաստանում, և՛ Ադրբեջանում: Կրեմլը կնպաստի հաշտեցմանը միայն սեփական պայմաններով, գտնում է Մանկոֆը:

«Radio Liberty»-ի զրուցակիցը՝ Նյու Յորքի քաղաքային համալսարանի պրոֆեսոր Ռաջան Մենոնը, ասել է, որ Լեռնային Ղարաբաղի շուրջ իրավիճակը մեծապես կախված է Մոսկվայի վարքագծից. «Հետաքրքիր կլինի հետևել այդ պայմաններում Պուտինի գործողություններին: Ռուսաստանը փաստորեն միակ ուժն է, որին Հայաստանը կարող է ապավինել, այսինքն՝ հայկական կողմի պահվածքն ամենայն հավանականությամբ կախված կլինի Կրեմլում տիրող տրամադրություններից: Բայց, մյուս կողմից, Բաքվի կողմում, որի զինված ուժերը մեծապես ամրապնդել են վերջին տարիներին, և որը կարող է գայթակղվել՝  Լեռնային Ղարաբաղում ռազմական հակամարտությամբ տնտեսական խնդիրներից մարդկանց ուշադրությունը շեղելով՝ Թուրքիան է կանգնած: Թուրքիայի նախագահը հայտարարել է, որ ինքը հույս ունի, որ Ադրբեջանը կգերակայի այս հակամարտությունում: Պոտենցիալ առումով՝ այս ամենը կարող է հանգեցնել Պուտինի և Էրդողանի միջև առճակատման՝ երկու ղեկավարների, ովքեր, ինչպես հայտնի է, պատրաստ չեն նահանջել ճգնաժամային իրավիճակներում: Այնպես որ, իմ կարծիքով, դեռևս չկան իրավիճակի զարգացման նման նշաններ: Ես գտնում եմ, որ Կրեմլը չէր ցանկանա հակամարտության վատթարացում այնքանով, որ Ռուսաստանը ստիպված կլիներ պայքարել Հայաստանի կողմում: Սակայն, ներկայիս իրավիճակում ինչ-որ բան կանխատեսելը դժվար է, շատ բան կախված կլինի շփման գծում ընդդիմախոսների վարքագծից»: