ԼՂ-ի ներկա դրությունը՝ միջազգային մամուլում

ԼՂ ներկայիս իրավիճակին շարունակում են անդրադարնալ միջազգային խոշոր լրատվամիջոցները:

«Ինչու՞ պետք է Արևմուտքը մտահոգվի ԼՂ-ի համար և գործի» վերնագրով ամերիկյան «The German Marshall Fund» հիմնադրամի կողմից հրապարակված հոդվածում անդրադարձ է կատարվում Եվրամիության կողմից «Ալևելյան հարևանություն» կոչվող տարածքում ներկա հինգ սառեցված հակամարտություններին՝ նշելով, որ դրանք ուղղակիորեն ազդում են միության անվտանգության վրա:

Հոդվածագրի խոսքով՝ միջազգային բանակցություններում ԼՂ-ը ներկայացնող Հայաստանը աջակցում է տարածաշրջանի ինքնորոշման իրավունքը, մինչդեռ Ադրբեջանը պնդում է տարածքի վրա իր գերիշխանությունը: Մատնանշելով, որ Բաքվի և Երևանի անզիջող հռետորաբանությունը խանգարում է հիմնախնդրի հաջողությամբ լուծմանը, հատկապես, երբ տարածաշրջանի գերիշխող պետությունները հակամարտությունը օգտագործում են տեղում համակրանք չվայելող իրենց գործողությունները արդարացնելու նպատակով:

«ԼՂ-ի մարտնչող կողմերը համաձայնության են եկել՝ իրենց կողմի դիակները անվնաս կերպով հետ վերադարձնելու համար» վերնագրով հոդված է տեղադրել բրիտանական «Reuters» գործակալությունը:

Հեղինակը նշում է, որ Ռուսաստանի օգնությամբ ԼՂ-ի հակամարտող կողմերը ուրբաթ օրը համաձայնվել են հրադադար պահպանել մինչ երկու կողմերը ռազմադաշտից հեռացնում են իրենց զոհերին:

Հոդվածի հեղինակը տեղեկացնում է նաև, որ հակամարտությունը Հարավային Կովկասում վախ է առաջ բերել, որ ռազմավարական կարևորություն ունեցող տարածաշրջանում, որտեղ, Ռուսաստանին շրջանցելով, Կասպիական ավազանից վառելիք և բենզին է տեղափոխվում համաշխարհային շուկաներ, կարող է պատերազմ սկսվել:

«ԼՂ-ի զինադադարը վտանգի մեջ է մինչ Ռուսաստանն ու Իրանը միանում են քննարկումներին» վերնագրով հոդված է հրապարակել ամերիկյան «ABC News»-ը: Դրանում ասվում է, որ մինչ Ռուսաստանն ու Իրանը դիվանագիտական ուժերը միացրել են պատերազմը կանխելու համար, հայկական և ադրբեջանական կողմերը շարունակում են միմյանց մեղադրել քաղաքացիական զոհերի պատճառ դառնալու մեջ:

Նշվում է նաև, որ Իրանի համար Բաքվի հանդիպումը շրջակա երկրների հետ տնտեսական կապերը ամրապնդելու հնարավորություն է: Հոդվածում ասվում է, որ հանդիպման ժամանակ Իրանի արտաքին գործերի նախարարը կենտրոնացել է Ադրբեջանի և Ռուսաստանի հետ տրանսպորտի, էներգիայի և անվտանգության խնդիրների շուրջ համագործակցության վրա:

Բրիտանական «The Guardian» լրատվամիջոցը հոդված է տեղադրել «Ճիշտն ու սխալը ԼՂ-ում» վերնագրով:

Հոդվածում ասվում է, թե արդեն վաղուց ժամանակն է, որ միջազգային համայնքը հակամարտությանը վերջ դնելու խաղաղ ծրագիր մշակի: Սակայն հայկական զինված ուժերի շարունակական ներկայությունը միջազգայնորեն Ադրբեջանինը համարվող տարածքում խաղաղության ճանապարհին մեծ խոչնդոտ է հանդիսանում: Որպես բարյացակամության նշան և միջազգային հորդորի շնորհիվ Ադրբեջանը պատասխանատու քայլ է արել և հայտարարել է միակողմանի հրադադար: Սակայն Հայաստանի կողմից հրադադար պահպանելու մերժումը հիշեցնում է, որ Հայաստանի վրա ավելի լուրջ միջազգային ճնշման կարիք կա:

«Լուծե՛ք ԼՂ-ի հակամարտությունը, մինչ այն կպայթի» վերնագրով Ամերիկյան «The New York Times»-ի կողմից տեղադրված հոդվածում տեղեկացվում է, որ ԼՂ-ի հակամարտությունը բռնկվել է նախորդ շաբաթ և բռնկման ավելի հավանական նախաձեռնող է անվանում Ադրբեջանին: Ասվում է, որ տասնյակ զինվորների կյանք խլած ընդհարումը այժմ հրադադարի փուլում է, սակայն այն ցանկացած պահի կարող է խարխլվել, եթե միջազգային համայնքը լուրջ քայլեր չձեռնարկի: