Ղարաբաղում արբիտր պետք է դառնա ԱՄՆ-ն. Շվեյցարիայի ԶԼՄ-ներ

Լեռնային Ղարաբաղի հակամարտությանն անդրադարձել են շվեյցարական լրատվամիջոցները:

Ռուսաստանն ու Թուրքիան առանցքային խաղացողներն են Ղարաբաղյան հակամարտության մեջ

Ռուսաստանը և Թուրքիան կարևոր դեր են խաղում Լեռնային Ղարաբաղի հակամարտության մեջ: Ռուսաստանի և Թուրքիայի միջև հարաբերությունները վատթարացել են այն պահից ի վեր, երբ անցյալ տարվա աշնանը թուրք-սիրիական սահմանի մոտ Թուրքիան խոցել էր ռուսական ռազմական ինքնաթիռը: Հայաստանի և Ադրբեջանի միջև հակամարտությունում այդ երկու գերիշխող ուժերը տարածաշրջանում հակառակ կողմերում են գտնվում: Եթե Թուրքիան լիովին աջակցում է Ադրբեջանին, ապա Ռուսաստանն ավելի շատ կապված է Հայաստանի հետ: Բայց միևնույն ժամանակ նա հակամարտության երկու կողմերի զենքի հիմնական մատակարարն է հանդիսանում, նշում է Berner Zeitung (BZ) թերթը:

Ռուսաստանը զգալի ներդրում է կատարել դեէսկալացիայի մեջ

Միևնույն ժամանակ, Ռուսաստանն ավելի շատ բան է արել, քան Թուրքիան՝ ղարաբաղյան հակամարտության դեէսկալացիայի գործում: Թեև, դա, հավանաբար, արվել է պրագմատիկ նկատառումներով, Ռուսաստանը լավ հարաբերություններ է ցանկանում Հայաստանի և Ադրբեջանի միջև, և, հետևաբար շահագրգռված չէ տարածաշրջանում ռազմական էսկալացիայով: Չնայած Ադրբեջանի բարոյական աջակցության՝ Թուրքիայի ակտիվ միջամտությունը ղարաբաղյան հակամարտութանը գործնականում բացառվում է: Նույնիսկ լայնածավալ հակամարտության դեպքում, խոսքը, հավանաբար, վերջին հաշվով, լինելու էր երկու անկախ կողմերի միջև պայքարի մասին՝ առանց տարածաշրջանի գերտերությունների անմիջական ազդեցության, կարծում է BZ-ն:

Ղարաբաղում արբիտր պետք է դառնա ԱՄՆ-ն

Ինչպես գրում է թերթը, դրսից չափից շատ ազդեցությանը թերահավատորեն են վերաբերվում և դիմակայում են ինչպես Հայաստանը, այնպես էլ Ադրբեջանը: Այդուհանդերձ, առավել կարևոր արտաքին խաղացող՝ Ռուսաստանի հետ միասին, պետք է դառնար նաև ԱՄՆ-ն՝ հակամարտության կողմերի վրա ազդելու և ստիպելու նրանց պահպանել զինադադարը, որպեսզի իրավիճակն այլևս չհանգեցներ սրման: